Búgin «Abai» shahtasynda apat bolǵan jerdegi úiindini tazartý jumystary aiaqtalady. Bul týraly Senatta ónerkásiptik qaýipsizdikti qamtamasyz etý taqyrybyndaǵy Úkimet saǵatynda QR Tótenshe jaǵdailar ministri Iýrii Ilin málim etti, dep habarlaidy QazAqparat.
Onyń aitýynsha, retteý júiesindegi qaita-qaita jasalǵan reformalar men biznes úshin talaptardy qysqartý boiynsha qadamdar ónerkásiptik qaýipsizdik salasynda memlekettik retteý jumystaryn álsirete tústi. Osy oraida ónerkásiptik tártip deńgeii tómendep, óndiristerde tehnogendik apattar sany ósti.
«Buǵan 7 qarashadaǵy «ArselorMittal Temirtaý» AQ Kómir departamentiniń «Abai» shahtasyndaǵy qaiǵyly oqiǵa mysal bola alady. Iaǵni onda metannyń taraýyna bailanysty apattan 6 kenshi qaza tapty. Búginde atalǵan kómir razrezinde jumystar ýaqytsha toqtatyldy, ol jerdi memlekettik komissiia tekserip jatyr. Belgili bolǵandai, bir mezgilde shahtada 8 myń tekshe metrden astam metan taraǵan», - dedi ministr.
Apat kezinde 100 tonnadan astam taý-ken massasy úiindisi túsken.
«Qazirgi kezde úiindini tazartý jumystary jalǵasyp jatyr. Meniń oiymsha, búgin keshke qarai bul jumystar aiaqtalady. Qazir ótip jatqan Úkimet saǵatynan keiin, komissiia tóraǵasy retinde oqiǵa ornyna (shahtaǵa) baramyn. Osy oraida atalǵan apattyń bolýy sebepterin anyqtaý jumystary júredi», - dedi Iýrii Ilin.
Eske salaiyq, 7 qarasha kúni saǵat 08:24-te «ArselorMittal Temirtaý» AQ Kómir departamentiniń «Abai» shahtasynda metan gazy tarai bastaǵan. Bul ýaqytta shahtada 64 adam jumys istep jatqan, 54-i evakýatsiialandy. Apat saldarynan eki adam zardap shegip, alty kenshi qaza tapty.
