بٷگٸن «اباي» شاحتاسىندا اپات بولعان جەردەگٸ ٷيٸندٸنٸ تازارتۋ جۇمىستارى اياقتالادى. بۇل تۋرالى سەناتتا ٶنەركەسٸپتٸك قاۋٸپسٸزدٸكتٸ قامتاماسىز ەتۋ تاقىرىبىنداعى ٷكٸمەت ساعاتىندا قر تٶتەنشە جاعدايلار مينيسترٸ يۋريي يلين مەلٸم ەتتٸ, دەپ حابارلايدى قازاقپارات.
ونىڭ ايتۋىنشا, رەتتەۋ جٷيەسٸندەگٸ قايتا-قايتا جاسالعان رەفورمالار مەن بيزنەس ٷشٸن تالاپتاردى قىسقارتۋ بويىنشا قادامدار ٶنەركەسٸپتٸك قاۋٸپسٸزدٸك سالاسىندا مەملەكەتتٸك رەتتەۋ جۇمىستارىن ەلسٸرەتە تٷستٸ. وسى ورايدا ٶنەركەسٸپتٸك تەرتٸپ دەڭگەيٸ تٶمەندەپ, ٶندٸرٸستەردە تەحنوگەندٸك اپاتتار سانى ٶستٸ.
«بۇعان 7 قاراشاداعى «ارسەلورميتتال تەمٸرتاۋ» اق كٶمٸر دەپارتامەنتٸنٸڭ «اباي» شاحتاسىنداعى قايعىلى وقيعا مىسال بولا الادى. ياعني وندا مەتاننىڭ تاراۋىنا بايلانىستى اپاتتان 6 كەنشٸ قازا تاپتى. بٷگٸندە اتالعان كٶمٸر رازرەزٸندە جۇمىستار ۋاقىتشا توقتاتىلدى, ول جەردٸ مەملەكەتتٸك كوميسسييا تەكسەرٸپ جاتىر. بەلگٸلٸ بولعانداي, بٸر مەزگٸلدە شاحتادا 8 مىڭ تەكشە مەتردەن استام مەتان تاراعان», - دەدٸ مينيستر.
اپات كەزٸندە 100 توننادان استام تاۋ-كەن ماسساسى ٷيٸندٸسٸ تٷسكەن.
«قازٸرگٸ كەزدە ٷيٸندٸنٸ تازارتۋ جۇمىستارى جالعاسىپ جاتىر. مەنٸڭ ويىمشا, بٷگٸن كەشكە قاراي بۇل جۇمىستار اياقتالادى. قازٸر ٶتٸپ جاتقان ٷكٸمەت ساعاتىنان كەيٸن, كوميسسييا تٶراعاسى رەتٸندە وقيعا ورنىنا (شاحتاعا) بارامىن. وسى ورايدا اتالعان اپاتتىڭ بولۋى سەبەپتەرٸن انىقتاۋ جۇمىستارى جٷرەدٸ», - دەدٸ يۋريي يلين.
ەسكە سالايىق, 7 قاراشا كٷنٸ ساعات 08:24-تە «ارسەلورميتتال تەمٸرتاۋ» اق كٶمٸر دەپارتامەنتٸنٸڭ «اباي» شاحتاسىندا مەتان گازى تاراي باستاعان. بۇل ۋاقىتتا شاحتادا 64 ادام جۇمىس ٸستەپ جاتقان, 54-ٸ ەۆاكۋاتسييالاندى. اپات سالدارىنان ەكٸ ادام زارداپ شەگٸپ, التى كەنشٸ قازا تاپتى.
