1414 نٶمٸرٸنەن كەلگەن بٸر رەتتٸك SMS-كودتى بٶگدە ادامعا ايتۋ جەكە دەرەكتەرٸڭٸز بەن قارجىڭىزعا قاۋٸپ تٶندٸرۋٸ مٷمكٸن. الاياقتار مۇنداي كودتى مەملەكەتتٸك قىزمەتتەردەگٸ ەرەكەتتەردٸ راستاۋ ٷشٸن پايدالانۋى ىقتيمال. NoFake.kz ماماندارى 1414 جٷيەسٸندەگٸ ٶزگەرٸستەردٸ تٷسٸندٸرٸپ, كودتى ايتىپ قويعان جاعدايدا نە ٸستەۋ كەرەگٸن ەسكە سالدى, دەپ حابارلايدى ult.kz.
بٸر SMS-كود ارقىلى نە ٸستەۋگە بولادى?
مۇنىڭ بەرٸ كودتىڭ قانداي ماقساتتا جٸبەرٸلگەنٸنە بايلانىستى. مەسەلەن, eGov پورتالىنا ەتسق ارقىلى كٸرگەن كەزدە 1414-تەن كەلگەن كود جەكە تۇلعانى قوسىمشا راستاۋ ٷشٸن قولدانىلادى. ال موبيلدٸ ازاماتتار بازاسىنا تٸركەلۋ كەزٸندە تەلەفون نٶمٸرٸن راستاۋعا قاجەت.
سوندىقتان كودتى بٶگدە ادامعا بەرۋ سٸزدٸڭ اتىڭىزدان باستالعان ەرەكەتتٸڭ راستاۋ كەزەڭٸنەن ٶتۋٸنە مٷمكٸندٸك بەرۋٸ مٷمكٸن. دەگەنمەن SMS-كودتى ايتۋ اۆتوماتتى تٷردە شوتتان اقشا الىندى نەمەسە نەسيە رەسٸمدەلدٸ دەگەندٸ بٸلدٸرمەيدٸ.
بۇعان دەيٸن كەيبٸر مەملەكەتتٸك سەرۆيستەرگە كٸرۋ ٷشٸن تەلەفونعا كەلگەن بٸر رەتتٸك كود جەتكٸلٸكتٸ بولاتىن. الايدا جاساندى ينتەللەكت جەنە تسيفرلىق دامۋ مينيسترلٸگٸنٸڭ مەلٸمەتٸنشە, 2025 جىلعى جەلتوقساننان باستاپ 1414 ارقىلى SMS جٸبەرەتٸن جٷيەلەرگە كٸرۋ ٷشٸن بيومەترييالىق سەيكەستەندٸرۋ, ەتسق نەمەسە eGov QR قاجەت.
بۇل تالاپتى ورىنداماعان جٷيەلەر 1414-تٸڭ SMS جٸبەرۋ قىزمەتٸنەن اجىراتىلعان.
SMS-كودتى ايتىپ قويساڭىز, نە ٸستەۋ كەرەك?
ەڭ الدىمەن, كٷمەندٸ قوڭىراۋدى دەرەۋ توقتاتىڭىز. الاياقتار ارتىنشا ٶزدەرٸن بانك نەمەسە قۇقىق قورعاۋ ورگانىنىڭ قىزمەتكەرٸ رەتٸندە تانىستىرىپ, «اتىڭىزعا نەسيە رەسٸمدەلٸپ جاتىر» دەپ قورقىتۋى مٷمكٸن.
باس پروكۋراتۋرانىڭ ەسكەرتۋٸنشە, مۇنداي جاعدايدا الاياقتار ازاماتتاردى ٶز اتىنا نەسيە الۋعا جەنە اقشانى «قاۋٸپسٸز شوتقا» اۋدارۋعا كٶندٸرەدٸ.
«مەملەكەتتٸك ورگاندار مەن بانكتەر ەشقاشان SMS-تەن بٸر رەتتٸك كودتاردى, كارتا دەرەكتەرٸن نەمەسە پارولدەردٸ سۇرامايدى», – دەپ ەسكەرتەدٸ باس پروكۋراتۋرا.
مۇنداي جاعدايدا مىنا ەرەكەتتەردٸ ورىنداۋ قاجەت:
- 1414-كە ٶزٸڭٸز حابارلاسىڭىز. SMS مەتٸنٸن مۇقييات وقىپ, قانداي قىزمەتكە قاتىستى كود كەلگەنٸن انىقتاڭىز.
- eGov جەكە كابينەتٸڭٸزدٸ تەكسەرٸڭٸز. «قىزمەتتەردٸ الۋ تاريحى» بٶلٸمٸنەن ٶزٸڭٸز بەرمەگەن ٶتٸنٸمدەردٸڭ بار-جوعىن قاراڭىز.
- بانككە حابارلاسىڭىز. ەگەر كارتا دەرەكتەرٸن دە بەرٸپ قويساڭىز نەمەسە كٷمەندٸ اقشا اۋدارىمى جاسالسا, بانكتٸڭ رەسمي نٶمٸرٸنە قوڭىراۋ شالىپ, كارتانى بۇعاتتاۋدى سۇراڭىز.
- پوليتسيياعا جٷگٸنٸڭٸز. شوتىڭىزدان اقشا شەشٸلگەن جاعدايدا 102 نٶمٸرٸنە حابارلاسىپ, ارىز بەرٸڭٸز.
- كرەديتتٸك تاريحىڭىزدى تەكسەرٸڭٸز. اتىڭىزعا نەسيە رەسٸمدەلگەنٸنە كٷمەندانساڭىز, eGov.kz ارقىلى جەكە كرەديتتٸك ەسەپ الىڭىز. ەگەر ٶزٸڭٸز الماعان قارىز انىقتالسا, كرەديت بەرگەن ۇيىمعا جەنە پوليتسيياعا حابارلاسىڭىز.
سونىمەن قاتار بولاشاقتا اتىڭىزعا نەسيە رەسٸمدەلۋٸنە شەكتەۋ قويۋ ٷشٸن eGov.kz نەمەسە eGov Mobile ارقىلى «ستوپ-كرەديت» قىزمەتٸن قوسۋعا بولادى.
ال ەتسق كٸلتٸن بەرٸپ قويساڭىز شە?
ەگەر SMS-كودپەن بٸرگە ەلەكتروندىق تسيفرلىق قولتاڭبا كٸلتٸن دە بٶگدە ادامعا جٸبەرسەڭٸز, pki.gov.kz سايتى ارقىلى قولدانىستاعى سەرتيفيكاتتى كەرٸ قايتارىپ, جاڭاسىن الۋ قاجەت.
ال تەك SMS-كودتى ايتىپ قويعان جاعدايدا الدىمەن ونىڭ قانداي قىزمەتكە قاتىستى ەكەنٸن انىقتاعان جٶن.
ەڭ باستىسى, ٶزٸن بانك نەمەسە مەملەكەتتٸك ورگان قىزمەتكەرٸ دەپ تانىستىرعان ادامنىڭ «اقشاڭىزدى قورعاۋ» تۋرالى نۇسقاۋىنا ەرمەڭٸز. بٶگدە ادامنىڭ ٶتٸنٸشٸمەن نەسيە الماڭىز جەنە اقشا اۋدارماڭىز.