Parlament Májilisiniń depýtattary tótenshe jaǵdailar baqylaýdy jetildirýge jáne eldiń epidemiologiialyq qaýipsizdigin qamtamasyz etýge baǵyttalǵan túzetýlerdi maquldady, dep habarlaidy QazAqparat.
Bul norma Parlament Májilisiniń jalpy otyrysynda maquldanǵan «Qazaqstan Respýblikasynyń keibir zańnamalyq aktilerine densaýlyq saqtaý máseleleri boiynsha ózgerister men tolyqtyrýlar engizý týraly» zań jobasynda eskerilgen.
«Budan basqa, Memleket basshysynyń 2020 jylǵy 27 sáýirde bergen tapsyrmasyn oryndaý úshin Úkimet usynǵan, tótenshe ahýal men tótenshe jaǵdailar kezinde densaýlyq saqtaý júiesiniń jumys isteýin, sanitariialyq-karantindik baqylaýdy jetildirýge jáne eldiń epidemiologiialyq qaýipsizdigin qamtamasyz etýge baǵyttalǵan túzetýler qaralyp qabyldandy. Onyń ishinde Biýdjet kodeksine, «Kontsessiialar týraly» Zańǵa densaýlyq saqtaý salasyndaǵy memlekettik-jekeshelik áriptestik jobalaryn iske asyrý protsesin ońailatý bóliginde»,- dedi depýtat Záýresh Amanjolova.
Zań jobasynyń mazmunyn jaqsartatyn jekelegen normalar naqtylandy.
«Densaýlyq saqtaý salasyndaǵy memlekettik-jekeshelik áriptestik jobalaryn iske asyrý protsesin ońailatý bóliginde Qazaqstan Respýblikasynyń Biýdjet kodeksine, «Kontsessiialar týraly», «Memlekettik múlik týraly» QR zańdaryna, eldegi tótenshe jaǵdai kezinde rejimdi buzǵany nemese shekteý is-sharalarynyń talaptaryn oryndamaǵyn úshin jaýaptylyqty kúsheitý bóliginde «Ákimshilik quqyq buzýshylyq týraly» QR Kodeksine túzetýler qabyldandy», - delingen Áleýmettik-mádeni damý komitetiniń tóraǵasy, depýtat Beibit Mamraevtyń atalǵan zań jobasy boiynsha qorytyndysynda.
Osy oraida taratylǵan málimette ákimshilik aiyppul 10-nan 100 ailyq eseptik kórsetkishke deiin nemese qamaqqa alý 15 táýlikke deiin ulǵaitylǵany kórsetilgen. Al qaita quqyq buzýshylyq úshin – 200 ailyq eseptik kórsetkish mólsherinde ákimshilik aiyppul nemese 30 táýlikke deiin qamaqqa alý kózdelgen.
