Joǵarǵy sot óńirlerdegi sottarǵa tótenshe jaǵdai rejimi toqtaǵannan keiin jumysty uiymdastyrý boiynsha hat joldady. Bul týraly Facebook-tegi paraqshasynda Joǵarǵy sottyń baspasóz hatshysy Aidos Sádýaqasov málim etti, dep habarlaidy "Ult aqparat".
Jergilikti sottarǵa joldanǵan hatta Memlekettik bas sanitarlyq dárigerdiń 10 mamyrda shyqqan №36 qaýlysy týraly, sonyń ishinde COVID-19 aýrýynan eskertý boiynsha sharalardy kúsheitý, olardyń jappai taralýyn boldyrmaý jaily aitylady.
«Joǵarǵy sot jergilikti sottardyń COVID-19 indetin juqtyrmaýy úshin qaýly erejelerin qatań saqtaýǵa, kelýshiler, sottar men qyzmetkerler úshin qaýipsiz jaǵdai jasaýǵa shaqyrady. Sonymen birge sottarǵa sanitarlyq-dezinfektsiialyq rejimdi kúsheitýge, kelýshilerdiń dene qyzýyn tekserýge, COVID-19 aýrýyna uqsas aýrý belgileri bar adamdardy sot ǵimaratyna kirgizbeýge keńes beredi», - dep jazady Aidos Sádýaqasov.
Onyń habarlaýynsha sot óndirisi men sottyń jumysyna qatysy joq adamdardy sot ǵimaratyna kirgizýge ári onda kóptep adam jinalýǵa qatysty qoiylǵan tyiym kúshinde qalady. Sebebi sot protsesine taraptardyń qatysýy COVID-19 qaýpiniń taralýyn kúsheitedi. Hatta Prezidenttiń jumysty qashyqtan júrgizýdiń sátti tájiribesi, ári onyń tiimdiligi, IT tehnologiialardyń qajettigi týraly 10 mamyrdaǵy TJ boiynsha memlekettik komissiia otyrysynda sóilegen sózi keltirilgen.
«Jolǵa qoiylǵan tájiribeni esepke ala otyryp, sottar onlain rejimdegi jumysyn jalǵastyrady. Tek qylmystyq ister qaralǵan kezdegi sot otyrystarynda qajetti jaǵdaida taraptardyń qatysýyna ruqsat etiledi», - deidi ol.
Aidos Sádýaqasov sonymen qatar isterge qatysty memlekettik organdarǵa da hat joldanǵanyn málim etti. Ol hattarda sotqa materialdardy elektrondy formatta jiberýge bolatyny jazylǵan. Shaǵymdar, ótinishter men ózge de qujattar «Sot kabineti» arqyly joldanady. Al qaǵaz júzinde toltyrylǵan ákimshilik quqybuzýshylyq týraly hattamalar men materialdar skanerlenip, elektrondy formatta jiberiledi.
Sottar myna jaiǵa qatysty isterdi jyldamyraq qaraýdy qamtamasyz etýge mindetteledi:
- aiqyndalmaǵan adamdar tobynyń, sonymen qatar áleýmettik turǵyda qorǵalǵan azamattardyń, eńbek ujymdarynyń múddesin eskere otyryp;
- shekteý sharalaryna qatysty (karanin);
- buiryqtyq jáne qysqartylǵan óndiris tártibindegi isterdi;
- ailyq ótemaqyny, alimentti, meditsinalyq qyzmetkerlerdiń qatysýymen bolǵan eńbek jáne ózge de daýlarǵa qatysty talaptar boiynsha isterdi.
