QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń kezekti otyrysy ótti. Bul týraly primeminister.kz habarlady.
Karantin jaǵdailarynda óńirlerde shekteý sharalaryn kezeń-kezeńimen jeńildetý, sondai-aq Nur-Sultan jáne Almaty qalalarynyń arasyndaǵy áýe reisterin qalpyna keltirý týraly Memleket basshysynyń tapsyrmasyn iske asyrý sharalaryna qatysty Premer-Ministrdiń orynbasary E. Toǵjanov, indýstriia jáne infraqurylymdyq damý ministri B. Atamqulov, densaýlyq saqtaý ministri E. Birtanov baiandady.
Úkimet basshysy QR Prezidenti Qasym-Jomart Toqaevtyń tapsyrmasyn iske asyrý aiasynda Memlekettik komissiianyń birqatar sheshim qabyldaǵanyn atap ótti:
1. Barlyq óńirlerde 2020 jylǵy 27 sáýirden, al Shymkent qalasynda biylǵy 1 mamyrdan bastap qatań sanitarlyq-epidemiologiialyq talaptardy saqtaýmen jumysqa kirisetin kásipkerlik sýbektileriniń qyzmet túrleriniń tizimi bekitildi:
· ónerkásiptik kásiporyndar;
· qurylys jáne jol qurylysy salalarynyń kompaniialary, iri qurylys dúkenderi;
· kólik, qoimalaý, aýyl sharýashylyǵy maqsatyndaǵy servistik, avtokólikterge qyzmet kórsetý salalaryndaǵy uiymdar jáne qyzmet kórsetý salasynyń keibir túrleri;
· bankter men qarjy sektorynyń uiymdary.
Budan ózge, II kezeń aiasynda Nur-Sultan qalasynda tómendegilerdiń jumysy qaita jandanady:
· qarjy jáne saqtandyrý sektorlarynyń uiymdary;
· elektrlik turmystyq tehnika, sonymen qatar saiajai maýsymyna arnalǵan taýarlar satatyn iri dúkender.
Almatyda myna salalardaǵy kompaniialar jumysyn qaita bastaidy:
· kólik jáne qoimalaý, aqparattyq-kommýnikatsiialyq tehnologiialar salalary;
· qarjy jáne saqtandyrý sektorlary;
· servistik qyzmet kórsetý salalary (TQS, dóńgelek aýystyrý, turmystyq jáne keńse tehnikalaryn jóndeý).
2. Oblystardyń, sondai-aq Nur-Sultan, Almaty jáne Shymkent qalalarynyń ákimderine biylǵy 27 sáýirden bastap óńirlik shtabtar ázirlegen erejelerge sáikes aýla alańdary men saiajai alqaptarynyń halyqqa qoljetimdiligin qamtamasyz etý tapsyryldy.
3. 2020 jylǵy 1 mamyrdan bastap Nur-Sultan men Almaty arasyndaǵy áýe qatynasyn qaita jandandyrý týraly sheshim qabyldandy. Bastapqy kezeńde ushý jiiligi kúnine 4 reisti quraidy. Reister kúsheitilgen sanitarlyq talaptardy saqtap, az jolaýshylarmen jáne salonda erekshe qashyqtyqty saqtaý arqyly júzege asyrylady.
«Ákimderge qoǵamdyq oryndardy, ónerkásiptik aýmaqtardy, áýejailar men balalardyń aýladaǵy oiyn alańdaryn sapaly túrde sanitarlyq óńdeýge, jalpy, sanitarlyq-epidemiologiialyq talaptardy qatań saqtap, oǵan baqylaý ornatýǵa erekshe kóńil bólýdi tapsyramyn», — dedi A. Mamin.
Sonymen qatar, otyrysqa qatysýshylar qazaqstandyqtardy shet elderden elge jetkizý, HQKO-lar jumysynyń jańa formatyn engizý jáne t. b. máselelerdi qarastyrdy.
