Elimizde 16-naýryzdan bastap 15-sáýirge deiin tótenshe jaǵdai jariialandy. Osyndai jaǵdaiǵa qaramastan tótenshe jaǵdai rejimin buzyp, paida tabý úshin jumysyn jalǵastyryp kele jatqan kásipkerlik nysandary áli anyqtalý ústinde.
Bul týraly "Ult aqparat" Túrkistan oblystyq Politsiia departamentine silteme jasap habarlaidy.
Túrkistan oblysy Politsiia departamentiniń jeke quramy kúsheitilgen rejimdegi qyzmetke kóshken. Iaǵni kúni-túni reid jumystardy júrgizilip, adam kóp jinalatyn basqosýlar, toi-jiyndar, is-sharalardy ótkizýge tyiym salyp, qaýipsizdik sharalaryn qadaǵalaýda.
Osyndai kezekti reid barysynda Sozaq aýdanynyń politseileri, aýyldardyń birinde býkmekerlik keńseniń jumys jasap jatqanyn anyqtady. Muny anyqtaǵan politseidiń aitýynsha, tótenshe jaǵdai jariialanyp, tyiym salynǵannan keiin, iaǵni 18-19 naýryz kúnderi oiyn-saýyq oryndarynyń jumysy toqtatylýy kerek dep, atalǵan býkmekerlik keńsege birneshe ret eskertý jasaǵan. Alaida býkmekerlik keńse ákimshisi oǵan qulaq aspai 23-naýryz kúni adam qabyldap otyrǵany belgili boldy.
«Qazaqstan Respýblikasy Prezidentiniń 15.03.2020 jylǵy Jarlyǵynyń talaptaryn óreskel buzǵan atalmysh turǵynǵa QR Ákimshilik quqyqbuzýshylyq kodeksiniń 476-baby «Tótenshe jaǵdai rejimin buzý» boiynsha hattama túzilip, aýdandyq sottyń qaýlysymen kináli dep tanylyp, 5 táýlikke ákimshilik qamaqqa alyndy.
«Túrkistan oblysynyń politseileri oiyn-saýyq, saýda ortalyqtary men dámhana-bar, toihana ielerine eskertedi: tótenshe jaǵdai kezinde zań talaptaryna sáikes áreket etip, múmkindiginshe kóp adam shoǵyrlanýyna jol bermeńizder. Bul ózińizdiń de, ózgelerdiń de densaýlyqtary úshin qajet bolmaq», - delingen habarlamada.
