Jaramdylyq merzimi ótken qujattardy aýystyrý biyl 10 shildege deiin aiyppul sanktsiialarynsyz júzege asyrylady, dep habarlaidy "Ult aqparat" Polisia.kz-ke silteme jasap.
Elimizde tótenshe jaǵdai rejimin engizgennen keiin HQKO jumysy 26 naýryzdan bastap toqtatyldy jáne birqatar memlekettik qyzmetter, onyń ishinde jeke kýálikti qaita rásimdeý boiynsha qyzmet kórsetilmedi.
Tótenshe jaǵdaidy engizý fors-majorlyq jaǵdai dep tanylady, sondyqtan QR Úkimeti azamattardyń keibir qujattaryn jaramdy dep taný týraly qaýly qabyldady:
1) «Jeke basty kýálandyratyn qujattar týraly» Zańnyń 6-babynda kórsetilgen jeke basyn kýálandyratyn qujattar;
2) júrgizýshi kýálikteri, onyń ishinde mindetti tehnikalyq baiqaýdan ótý týraly ýaqytsha kýálikter;
3) azamattyq jáne qyzmettik qarý jáne onyń patrondaryn satyp alýǵa, saqtaýǵa jáne alyp júrýge ruqsattar;
4) kirýge jáne ketýge arnalǵan ruqsattar (vizalar), Qazaqstan Respýblikasynda ýaqytsha jáne turaqty turýǵa arnalǵan ruqsattar, eńbekshi kóship kelýshige jáne sheteldik jumys kúshin tartýǵa jumys berýshige ruqsattar, pana izdeýshi adamnyń kýáligi.
Jaramdylyq merzimi tótenshe jaǵdai kezeńinde ótken joǵaryda kórsetilgen qujattar tótenshe jaǵdai joiylǵan kúnnen bastap kúntizbelik alpys kún ishinde, iaǵni biyl 10 shildege deiin jaramdy dep tanylady.
Tótenshe jaǵdai rejimi kezinde jáne ol aiaqtalǵan kúninen bastap kúntizbelik 60 kún ishinde on alty jasqa tolǵan jáne jeke basty kýálandyratyn qujat almaǵan azamattar úshin týý týraly kýálik nemese Qazaqstan Respýblikasy azamatynyń pasporty kórsetilgen kezeńde jeke basyn kýálandyratyn negizgi qujat bolyp tabylady.
