Elimizde tótenshe jaǵdai rejimin buzǵany úshin 1,5 myńnan astam azamat ákimshilik qamaýǵa alyndy. Bul týraly búgin QR Parlamenti Májilisiniń jalpy otyrysynda Ishki ister ministriniń orynbasary Iýrii Ilin aitty, dep habarlaidy QazAqparat.
Otyrys barysynda Májilis depýtaty Sergei Zvolskii tótenshe jaǵdai rejimi aiaqtalyp, al ákimshilik jazany óteý merzimi bitpegen azamattardyń jaǵdaiy ne bolatynyn suraǵan edi.
«Aitalyq, azamat tótenshe jaǵdai rejimin buzǵany úshin 15 táýlikke qamaýǵa alynyp, 10 táýligin ótedi. Al tótenshe jaǵdai alynyp tastaldy. Osyǵan orai meniń suraǵym bar. Tótenshe jaǵdai rejimi aiaqtalǵan merzimde ákimshilik jazanyń oryndalý merzimi aiaqtalǵan tulǵalarǵa qatysty 21-baptyń 2-bólimi qalai áreket etetin bolady? Tótenshe jaǵdai rejimin buzǵany úshin jaýapkershilikke tartylǵandardyń statistikasy qandai jáne mundai buzýshylyqtarǵa jol bermeý úshin qandai sharalar qabyldanyp jatyr?», - dedi depýtat.
Bul saýalǵa jaýap bergen Ishki ister ministriniń orynbasary Iýrii Ilinniń aitýynsha, ákimshilik tutqynǵa alý týraly sheshimdi sot shyǵarady jáne jaza óteý merzimi 5-ten 15-táýlikke deiin belgilengen.
«Eger tótenshe jaǵdai rejimin alyp tastaý týraly sheshim qabyldansa da jaza tolyq ótelýi tiis. Ákimshilik jaza týraly aitar bolsaq, 1,5 myńnan astam adam ýaqytsha ustaý úshin oqshaýlaǵyshtarǵa qamaldy. 5 myńnan astam adamǵa aiyppul túrinde jaza qoldanyldy», - dedi ol.
