Tótenshe jaǵdai rejimi kezeńinde elordaǵa zańsyz kelgen 41 adam Qazaqstan aýmaǵynan shyǵaryldy. Bul týraly Nur-Sultan qalalyq Politsiia departamentinen málim etti, dep habarlaidy QazAqparat.
«Qazirgi ýaqytta elordada jaǵdai turaqty. Quqyq qorǵaý organdary tiisti qoǵamdyq tártip pen azamattardyń qaýipsizdigin qamtamasyz etýde. Qala perimetri boiynsha 6 blokbeket táýliktik rejimde jumys istep tur. Bir táýliktiń ishinde qalada 11 qylmys, 105 jol-kólik oqiǵasy tirkeldi, jaraqat alǵandar joq. Tótenshe jaǵdai rejimi jariialanǵannan beri belgilengen rejimdi buzý nemese memlekettik organ belgilegen talaptardy oryndamaýdyń 353 faktisi tirkeldi. Kinálilerge qatysty sheshimdi sot qabyldady», - dep atap ótedi departamentten.
Vedomstvo málimetinshe, tótenshe jaǵdai kezinde elorda kósheleri men qoǵamdyq oryndarda tiisti quqyqtyq tártipti qamtamasyz etý maqsatynda Nur-Sultan qalasynyń politsiia qyzmetkerleri Qazaqstan Respýblikasynda bolý qaǵidalaryn buzǵan sheteldikterdi anyqtaý boiynsha is-sharalar júrgizýde. Bazarlardyń, saýda úileriniń, sýpermarketter men qurylys nysandarynyń jáne taǵy basqa nysandardyń aýmaǵynda jergilikti-reidtik is-sharalar ótkizilýde.
Kóshi-qon zańnamasyn buzýdyń 1 300-den astam faktisi anyqtaldy. Onyń ishinde 295 faktisi shetel azamattary tarapynan jasalǵan, 41 shetel azamaty elden shyǵaryldy. Sonymen qatar tirkeýsiz nemese jeke basyn kýálandyratyn qujattarsyz turyp jatqany jáne turǵyn úi ieleriniń óz úilerinde turmaityn adamdardy tirkeýge jol bergenderi úshin Qazaqstan Respýblikasynyń 940-tan astam azamaty jaýapqa tartyldy.
«Elimizdiń kóshi-qon salasyndaǵy zańnamasyn buzǵany úshin sheteldikterdi qabyldaǵan 82 azamat ákimshilik jaýapqa tartyldy. Osy baǵyttaǵy jumystar jalǵasýda. Atalǵan aldyn alý is-sharasyn ótkizý barysynda politsiia qyzmetkerleri elde bolý merzimi ótkennen keiin ketýden jaltarǵan eki shetel azamatyn anyqtady. Quqyq buzýshylarǵa qatysty ÁQBtK-niń 517-baby 4-bóligi boiynsha ákimshilik hattama toltyryldy. Ákimshilik quqyq buzýshylyqtar jónindegi mamandandyrylǵan aýdanaralyq sottyń sheshimimen sheteldikter Respýblikadan tysqary jerge shyǵaryldy. Ýchaskelik politsiia inspektorlary 5882 jaldamaly turǵyn úi men 490 hosteldi tekserdi», - delingen vedomstvo málimetinde.
