«Atameken» ulttyq kásipkerler palatasynyń basqarma múshesi, apparat basshysy Nuraly Bókeihanov elde tótenshe jaǵdaidyń jariialanýynan zardap shekken kásipkerler týraly baiandady, dep habarlaidy QazAqparat.
«Kásipkerler palatasy 16 naýryzda arnaiy jedel shtab qurdy, oǵan úsh kúnde kásipkerler tarapynan 5 660 ótinish qabyldandy. Biznesmender kóbine jumysshylar sanyn qysqartýǵa májbúr bolǵan kompaniialarǵa ne isteý qajettigi týraly, ǵimarat jáne jer jaldaý aqysyn tóleý merzimin uzartý nemese odan bosatý, kommýnaldyq qyzmetter aqysynan bosatý, shikizattyń jetispeýshiligi nemese kúrt qymbattaýy, quramdas bólshekterdiń jetispeýshiligi syndy suraqtardy qoidy. Munyń barlyǵy – shekaranyń jabylýy men arnaiy qaýipsizdik sharalaryn engizýdiń saldary», - dedi N. Bókeihanov onlain-brifingte.
Onyń aitýynsha, saýal jibergen 5 660 kompaniianyń 85% – shaǵyn biznes, 13% – orta biznes jáne 2% – iri biznes. Olardyń 2 myńnan astamy – qyzmet kórsetý salasy, bilim berý ortalyqtary, sulýlyq salondary, konsalting, poligrafiia salalaryn qamtidy.
«Saýal joldaǵan 5 myńnan astam kompaniianyń 50% – Nur-Sultan men Almaty qalasynyń kásipkerleri. Kásipkerlerdiń ózderi qandai kómek surap otyr? Árine, eń aldymen qarajat boiynsha týyndaityn suraqtar. Bes myń kásipkerdiń 60% qarjylai qiyndyqtarǵa ushyrady degen aqparat keldi. Olardyń eń basty suraǵy – nesie tóleý merzimin uzartý, ekinshisi – salyq tóleý merzimin uzartý, úshinshisi – kásiporyndardyń eńbek resýrstaryn saqtaýǵa ótemaqy berý. Tórtinshi – jaldaý aqysyn azaitý nemese odan bosatý. Kóptegen kásipkerler shikizat pen bólshekterdiń jetispeýshiligi máselesin aitty», - dedi N. Bókeihanov.
Bul aqparattyń barlyǵyn kásipkerler palatasy júielendirip, memlekettik organdarǵa jiberdi. Qazir memorgandarmen arnaiy sharalar júrgizilip jatyr.
«Kásipkerlerdi qoldaý úshin eń basty qoldanylatyn shara – olardy salyqtan bosatý. Salyq tóleýshilerdiń keibir sanaty – jeke kásipkerler men zańdy tulǵalardy múlik salyǵyn tóleýden bosatý, aýylsharýashylyq óndirýshilerin aýylsharýashylyq jer salyǵynan bosatý, jalpyǵa birdei rejimdi qoldanatyn tulǵalardy iri qara mal jáne asyl tuqymdy maldy importtaý salyǵyn tóleýshilerdi bosatý, salyqtyq esepti ótkizý merzimin osy jyldyń ekinshi, úshinshi toqsandaryna aýystyrý jáne de basqa salyqtyq kómekter», - dedi Nuraly Bókeihanov.
Aita keteiik, 17 naýryzda Memleket basshysy daǵdarystan japa shekken jeke kásipkerler men shaǵyn jáne orta biznes ókilderin qoldaý sharalaryn qabyldaýdy tapsyrdy.
