Sybailas jemqorlyqqa qarsy qyzmet 260 myń kólikti tehnikalyq baiqaýdan zańsyz ótkizdi degen kúdikpen 30 adamnyń ústinen tergeý júrgizip jatyr, dep habarlaidy QazAqparat.
Bul týraly Sybailas jemqorlyqqa qarsy is-qimyl agenttigi tóraǵasynyń kómekshisi Shyńǵys Alekeshev aitty.
«Sybailas jemqorlyqqa qarsy qyzmet kóliktik baqylaý salasyndaǵy uiymdasqan qylmystyq toptyń qyzmetin áshkereledi. Qylmystyq top músheleri kóp jyl boiy elimizdiń 5 óńirinde avtokólikterdi jalǵan tehnikalyq baiqaýdan ótkizýmen ainalysqan. Elordanyń kóliktik baqylaý inspektsiiasynyń burynǵy bastyǵy bastaǵan jalpy qatysy bar 30 adam anyqtaldy.
Inspektsiianyń burynǵy bastyǵy sot sheshimimen qamaýǵa alyndy. Jasandy tehnikalyq baiqaýlar jalǵan tulǵalar arqyly júrgizilgen. Olardyń atyna 28 firma rásimdelgen. Bul rette atalǵan firmalarda ne tiisti ǵimarat, ne tehnikalyq jabdyqtar, ne mamandar da bolmaǵan», - deidi agenttik ókili.
Onyń málimeti boiynsha, kúdikti top músheleri 2017 jyldan beri kólikterdi naqty teksermei, 260 myńnan astam diagnostikalyq karta jasaǵan.
«Zańsyz paida somasy jarty milliard teńgeden asyp otyr. Qazir tergeý amaldary júrip jatyr. Barsha kásipkerlerge, avtokólik ielerine jáne júrgizýshilerge aitarymyz, osyndai alaiaqtardyń qyzmetine júginý arqyly, iaǵni, avtokólikterdi tehnikalyq baiqaýdan ótkizbeý arqyly sizder ózińizdiń ǵana emes, basqalardyń da ómirine qaýip tóndiresizder. Sonymen qatar, jalǵan qujatty paidalanǵany úshin qylmystyq jaýapkershiliktiń bar ekenin eskertemiz», - deidi Shyńǵys Alekeshev.
