Premer-ministrdiń orynbasary Eraly Toǵjanov qazaqstandyqtarǵa "Halyqtyń tabysyn arttyrý" baǵdarlamasyn tanystyrdy, dep habarlaidy Sputnik Qazaqstan.
Vitse-premer bul halyqtyq baǵdarlama ekenin atap ótti.
"Birinshiden, baǵdarlama 1 millionnan asa biýdjet salasy qyzmetkeriniń, sonymen qatar kvazimemlekettik sektordyń óndiristik personalynyń jalaqysyn arttyrýǵa baǵyttalǵan. Onyń ishinde 850 myń biýdjet, 200 myń óndiristik saladaǵy azamattar bar", - dedi Toǵjanov ortalyq kommýnikatsiialar qyzmetinde ótken baspasóz máslihatynda.
Onyń aitýynsha, kelesi aptada "Samuryq-Qazyna" qorynda kvazimemlekettik sektorǵa qatysty jiyn ótedi. Kezdesý barysynda jalaqyny kóterý máseleleri talqylanady.
"Sondai-aq 2,8 million qyzmetkerdiń jalaqysyn biznes pen memleket arasyndaǵy qarym-qatynasqa tikelei qatysy bar jobalar arqyly kóbeitemiz. Ásirese, memlekettiń tikelei qoldaýyn alatyn biznes salasyna 2,8 million azamattyń jalaqysyn kóterýge qarsy talap qoiylady", - dedi Premer-ministrdiń orynbasary.
Toǵjanov baǵdarlama aiasynda ekonomikanyń túrli salasynda 2025 jylǵa deiin 2 millionnan astam jumys orny ashylatynyn aitty. Atap aitqanda, óndiris salasynda – 950 myń, infraqurylym salasynda – 583 myń, aýyl sharýashylyǵynda – 458 myń, týristik salada – 59 myń jumys orny qurylady. Munyń bári tabysqa tikelei áser etetin jobalar, dedi úkimet basshysynyń orynbasary.
