Tórt balany jalǵyz ózi asyrap otyrǵan Maral Boranbaeva jańa formattaǵy ataýly áleýmettik kómekpen úige kiris pen birge yrys ta kelgenin aitady, dep habarlaidy QazAqparat tilshisi.
Maral Boranbaevanyń eń kishi balasy múmkindigi shekteýli jan retinde tirkelgen. Úidegi 4 balanyń eń úlkeni 19-da. Ekinshisi 2002 jyly týsa, úshinshisi 2008 jyly dúniege kelgen.
«Jańa formattaǵy áleýmettik kómektiń alǵashqy tólemin aldyq. 101 400 teńge shyǵypty. Buǵan deiin múgedek balanyń asyraýshysy retinde járdemaqy alatynbyz. Ol múlde jetpeitin. Em-domy bar, ortopediialyq aiaq kiimin alý kerek. Jazǵy aiaqkiiminiń ózi 25 myń teńge turady. Úlken ulymnyń aiaq kiimi de tozyp júrgen. Jańa formattaǵy áleýmettik kómek qolymyzǵa túsken sonyń bárin jańaladyq. Kirispen birge úiimizge yrys ta kirgendei» - deidi elordalyq ana.
Qazir ol 4 balasymen birge tolymsyz otbasy retinde berilgen arendalyq baspanada turyp jatyr.
«Ai saiyn bes myń teńge tóleýimiz kerek. Qaryzdan erterek qutylý úshin odan kóbirek tóleýge tyrysyp júrmin» - deidi Maral Boranbaeva.
