Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaiyndy» isi boiynsha Erkin Izbasar jaýap berip jatyr. Ol óziniń ómiri men densaýlyǵy týraly aitty, dep habarlaidy QazAqparat tilshisi.
Aiyptalýshy Almaty oblysynda týǵan. Keiin Aqtóbe oblysy, Temir qalasyndaǵy orta mektepti úzdik bitirip, Aqtóbe meditsinalyq institýtyna oqýǵa túsken. Tórtinshi kýrsqa kelgende Aqtóbe veterinariialyq ýniversitetine túsip, oqýdy aiaqtaǵan. Ol 1984-1986 jyldary áskerge baryp, boryshyn ótegen. Al 1997 jyly jol-kólik oqiǵasyna tap bolyp, arbaǵa tańylǵan. Sodan beri 13 ret ota jasalǵan. Ota Aqtóbe, Almaty qalalary men Germaniia, Resei, Qytaida júrgizilgen. Sottalýshy Erkin Izbasar ózine taǵylǵan aiyppen kelispeitinin, qazir densaýlyǵy aýyr ekenin jetkizdi.
«Úshinshi ret sotqa kelip turmyn. Meni sottai bere me? On jyl saiyn sottap otyr. 1937 jyly bárin sottap, atyp tastady. Shyndyq jeńedi. Meni qamap, uryp-soǵyp, tisimdi syndyryp tastady. Qyzýym da kóterilip otyr edi. Qapty basyma kigizdi.
«Qinamaidy abaqtyǵa japqany,
Qiyn emes, darǵa asqany atqany.
Maǵan qiyn osylardyń bárinen,
Óz aýylymnyń itteri úrip-qapqany», dep aitqym keledi. Al Aýhat Qaliev únemi janymda júrdi. Bul bosqa otyr, meni kóterip júrgeni úshin. Meni kúnine 8-12 adam kóterip júredi. «Nege kómektesesiń?» dep suraidy. Men úshin, saýaby úshin tasydy»,- dedi Erkin Izbasar sot otyrysy kezinde.
Aita keteiik, keshe sottalýshy Qaldymurat Qartjan sot aldy jaýap alý kezinde ózin azaptaǵanyn jetkizgen bolatyn. Sondyqtan ol sot aldy bergen jaýabynan bas tartty. Búgingi sot otyrysy kezinde qylmystyq top qurdy, munai urlady, zańsyz saqtap, tasymaldady dep aiyptalyp jatqan Erkin Izbasar jaýap berip jatyr.
«Meniń aiybym - betine tike, shyndyqty aitamyn. Qazir sabyr saqtap otyrmyn. Bálkim, BUU-ǵa shaǵym túsiremin. Basqa amalym joq. Múgedek bolǵan adamdy eshkim túsinbeidi. Men bir jerde jatyp, bárin jumsaýǵa týra keledi. Cebebi, ózime qajet zattardy baryp ala almaimyn. Adamdar da sharshaidy menen. Biraq amal joq», - dedi Erkin Izbasar.
Sot otyrysy jalǵasyp jatyr.
