Foto: instagram.com/toregalitoreali
Tanymal ánshi Tóreǵali Tóreáliniń ústinen bilik ókilderin qorlaý baby boiynsha qylmystyq is qozǵaldy, dep habarlaidy "Ult aqparat" Polisia.kz Telegram-arnasyna silteme jasap.
Almaty qalalyq politsiia departamentiniń málimetinshe, jaqynda politsiia qyzmetkerlerimen esirtkilik masań kúiinde kólik júrgizgeni úshin ustalǵan, MAÁS sheshimimen 20 táýlikke ákimshilik qamaýǵa alynǵan A. esimdi azamat Almaty qalasy PD-niń (ákimshilik qamaýǵa alynǵandarǵa arnalǵan) ustaý izoliatorynda otyr.
"Meditsinalyq saraptamanyń qorytyndysyna sáikes, ony ákimshilik qamaýǵa alýdan bosatýǵa kórsetkish joq.
Sonymen qatar A. esimdi azamatqa qatysty QR QK-niń 378-babynda (Bilik ókilin qorlaý - red.) kózdelgen qylmystyq quqyq buzýshylyq belgileri boiynsha da qylmystyq is tirkeldi. Atalǵan qylmystyq is boiynsha óndiristi Almaty qalasy PD anyqtaý basqarmasy júrgizip jatyr" - delingen habarlamada.
Esterińizge sala keteiik, 14 maýsymda qazaqstandyq ánshi Tóreǵali Tóreáli jol erejesin buzyp, politsiiamen janjaldasqan bolatyn. Ol 20 táýlikke qamaýǵa alynyp, 7 jylǵa kólik júrgizý quqyǵynan aiyryldy.
Qamaýda jatqan ánshiniń densaýlyǵy nasharlap, jedel járdemmen aýrýhanaǵa da jetkizilgen.
