Foto: Ashyq derekkózden
AQSh-tyń Florida shtatynda kámeletke tolmaǵan balalarǵa júieli túrde qatygezdik kórsetken otbasynyń tórt múshesi — Braian jáne Djill Griffet esimdi erli-zaiypty men olardyń týystary Dallin (21 jasta) jáne Liberti Griffet (19 jasta) qamaýǵa alyndy, dep habarlaidy Ult.kz El.kz internet portalyna silteme jasap.
Bul týraly Sky News habarlady.
Tergeý málimetinshe, olar jalpy sany toǵyz balany — bes biologiialyq jáne tórt asyrandy balany azaptap, adam tózgisiz jaǵdaida ustaǵan.
Politsiia anyqtaǵan derekterge sáikes, balalar eki qabatty kereýettiń astyndaǵy fanerden jasalǵan torlar ishinde kúshtep qamalyp otyrǵan. Tártipke baǵynbaǵan balalarǵa jaza retinde betine sirke sýyn shashyp, taiaqpen uryp, tipti dárigerdiń taǵaiyndaýynsyz dári-dármek bergen. Balalarǵa oqý men jazýǵa úirenýge ruqsat berilmegen, olar ainalasyndaǵy adamdarǵa óz ómirleri týraly jalǵan aitýǵa májbúr bolǵan.
Ásirese, asyrandy balalardyń jaǵdaiy óte múshkil bolǵany anyqtaldy. Olardyń kópshiligi óz aty-jónin de, týǵan kúnin de bilmegen. Olar barlyq aýyr úi jumystaryn oryndaýǵa mindettelip, kún saiyn fizikalyq jáne psihologiialyq qysym kórgen. Al biologiialyq balalar esh jumys istemei, oiyn oinaýǵa, teledidar kórýge tolyq erkindikke ie bolǵan.
Qylmystyq is shirkeý qyzmetkeriniń kúdigi arqyly áshkerelendi. Ol shirkeý lagerine kelgen bir balanyń qolynda elektroshoker bar ekenin baiqap, tiisti organdarǵa habar bergen. Tekserý barysynda qasiretti jaǵdaidyń shynaiy kórinisi ashylyp, dereý tergeý bastaldy. Alǵashqy tergeý kezinde asyrandy balalar tordyń ishinde tabylǵan, olardyń keibiriniń denesinde soqqy izderi men teri zaqymdary bolǵan.
Qazirgi ýaqytta barlyq kúdiktiler tergeý izoliatorynda qamaýda. Balalar Florida shtatynyń Balalar jáne otbasy isteri departamentiniń ýaqytsha qamqorlyǵyna berildi. Is boiynsha tergeý jalǵasyp jatyr.
