Prezident Qasym-Jomart Toqaev Gonkongta ótken semserlesýden álem chempionatynda tarihi jeńiske jetken Qazaqstan erler quramasyn quttyqtady, dep habarlaidy ult.kz.
Memleket basshysy óz quttyqtaýynda bul jeńistiń el sporty úshin erekshe mańyzǵa ie ekenin atap ótti.
Prezidenttiń aitýynsha, Qazaqstan quramasynyń álem chempionatyndaǵy tuńǵysh altyn medali – sportshylardyń joǵary sheberliginiń, bolattai berik mineziniń jáne myqty komandalyq rýhynyń aiqyn dáleli.
Qasym-Jomart Toqaev jeńimpaz sportshylar men jattyqtyrýshylar quramyna Qazaqstannyń álemdik sport arenasyndaǵy bedelin arttyrýǵa qosqan úlesi úshin shynaiy alǵysyn bildirdi.
Sondai-aq Memleket basshysy ulttyq quramaǵa aldaǵy jarystarda da tolaiym tabys pen jańa jeńister tiledi.
Aita keteiik, Gonkongta ótip jatqan eresekter arasyndaǵy semserlesýden álem chempionatynda Qazaqstan quramasy tarihta alǵash ret álem chempiony atandy.
Finalda jerlesterimiz Rýslan Kýrbanov, Erlik Sertai, Kirill Prohodov jáne Vadim Sharlaimov Ýkraina quramasyn 45:40 esebimen jeńip, Qazaqstanǵa semserlesý tarihyndaǵy alǵashqy altyn medaldi syilady.
Qazirgi tańda álem chempiony atanǵan Qazaqstannyń erler quramasy álem reitinginde 5-orynda tur.
