Topyraqtyń agrohimiialyq quramy týraly aqparattyń dáldigin arttyrý úshin synamany irikteý ádisi ózgerip jatyr. Búgin Senattaǵy parlamenttik tyńdaýda Aýyl sharýashylyǵy ministri Erbol Qarashókeev osylai aitty, dep habarlaidy QazAqparat.
«Qazirgi ýaqytta ministrlik joǵaryda atalǵan problemalardy sheshý baǵytynda birqatar sharalardy júzege asyrýda. Ósimdik sharýashylyǵynda, eń aldymen, naqty ártaraptandyrýdy júzege asyryp, óndiriske ǵylymi negizdelgen aýyspaly egistikti, zamanaýi resýrs únemdeitin tehnologiialardy engizýdi basty maqsat retinde anyqtap otyrmyz. Sondai-aq, tehnikalyq jaraqtaný deńgeiin arttyryp, tuqym sharýashylyǵyn damytyp, osylardyń negizinde salanyń turaqty damýyna jaǵdai týǵyzbaqpyz. Ol úshin birinshi kezekte jer paidalaný protsesterin baqylaýdyń zamanaýi ádistemelerin ázirlep qoldanysqa engizýimiz kerek. Bul jerde ǵaryshtyq monitoring, Jerdi qashyqtyqtan zondtaý múmkindigin jáne topyraqtyń agrohimiialyq quramyn aiqyndaýdyń aldyńǵy qatarly ádisterin tolyǵymen paidalaný maqsatynda egistikter men jaiylymdardaǵy ósimdikterdiń túrlik quramyn aiqyndaýdyń ádistemelerin arnaiy ǵylymi baǵdarlamasy aiasynda júzege asyrýdy qolǵa aldyq», - dedi E. Qarashókeev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Onyń aitýynsha, jospar boiynsha ony 2024 jyldan bastap óndiriske engizýdi qamtamasyz etpekpiz. Sonymen qatar, respýblikalyq agrohimiia qyzmetiniń jumysyn jetildirýge qajetti qarjy bólinbek.
«Topyraqtyń agrohimiialyq quramy týraly aqparattyń dáldigin arttyrý úshin synamany irikteý ádisi ózgerýde. Endi topyraq synamasy búgingi 75 gektardyń ornyna árbir 20 gektardan alynatyn bolady.
Budan basqa, jer inspektsiiasy qyzmetin nyǵaitý, onyń biryńǵai vertikalyn qurý jáne onyń aiasynda topyraqtyń qunarlylyǵyn baqylaý jónindegi bytyrańqy qurylymdardyń múmkindikterin biriktirý esebinen qurylymdyq sipattaǵy sharalar qabyldanatyn bolady. Sonymen qatar, tuqym sharýashylyǵy júiesin tártipke keltirý jumystaryn bastadyq. Onyń ishinde ǵylymi uiymdardy selektsiianyń zamanaýi ádisterine kóshirý men Ulttyq agrarlyq ǵylymi-bilim berý ortalyǵynyń ǵylymi jáne tájiribeli sharýashylyqtary negizinde tuqym sharýashylyqtarynyń úilesimdi júiesin qurýdy atap aitýǵa bolady. Sol siiaqty tuqymdardy baqylaýdyń tsifrlik júiesin ázirleý júrgizilýde, bul búkil el boiynsha tuqym materialdarynyń qozǵalysyna qatań baqylaý ornatýǵa múmkindik beredi», - dedi ministr.
Onyń paiymynsha, osynyń bári ósimdik sharýashylyǵyndaǵy ahýaldy ózgertip, onyń damý turaqtylyǵyn jáne de básekege qabilettiligin arttyrýda naqty nátijelerge qol jetkizýge yqpal etedi.
«Tek osylai ǵana biz álemdik azyq-túlik naryǵyndaǵy básekelestikte óz deńgeiimizdi saqtai otyryp, búgingi qol jetkizilgen eksporttyq potentsialymyzdy odan ári arttyra alamyz», - dedi vedomstvo basshysy.
