Tómen jalaqy alatyn adamdardyń ailyǵyn birneshe esege kóterý qajet. Mundai usynysty búgin QR Parlamenti Senatynda ótken jergilikti ókildik organdarmen ózara is-qimyl jónindegi keńes otyrysynda senator Asqar Beisenbaev jasady, dep habarlaidy QazAqparat tilshisi.
«Tómen jalaqy alatyn kóptegen azamattarǵa memleket tarapynan tabys salyǵyn 90 paiyzǵa tómendetý úlken kómek dep sanaimyn. Bul der kezinde kóterilgen másele. Degenmen, 120 myńǵa jýyq tómen jalaqymen mektepte, ákimdikterde eden jýatyn adamdar bar. Olardyń jalaqysy 50 myń teńgeniń tóńireginde. Salyqty tómendetý olarǵa - kómek. Biraq, olardyń aldaǵy ýaqytta jalaqysy qalai bolady?», - dedi senator.
Onyń aitýynsha, elimizde ailyq 10 paiyzǵa kótergen kezde 50 myń teńge jalaqy 5 myńǵa, 100 myń 110 myńǵa, al 1 mln jalaqy 1,1 mln-ǵa kóteriledi.
«Tómen jalaqy men ortasha jalaqy arasyndaǵy aiyrmashylyq ol kóterilgen saiyn ulǵaiyp keledi. Buǵan jalaqy kóterilgen kezde mindetti túrde bazardaǵy barlyq taýarlardyń qymbattaityndyndyǵyn eske alar bolsaq, onda olardyń kún kórisi tómendep bara jatyr. Olardyń jaǵdaiyn qalai túzeimiz?», - dep surady Asqar Beisenbaev otyrysqa qatysqan elimizdiń Eńbek jáne halyqty áleýmettik qorǵaý vitse-ministri Svetlana Jaqypovadan.
Vitse-ministrdiń aitýynsha, tómen jalaqyny kóterýge baǵyttalǵan birneshe sheshim qaralyp jatyr.
«Birinshi - tómengi ailyqty kóbeitý. Iaǵni, búgingi tańda ol 28 284 teńge bolsa, onda osy kórsetkishti qaita qaraý nemese kóterý. Ekinshi - osy salada jumys istep otyrǵan azamattardyń eńbekaqysyn arttyrý úshin bazalyq laýazymdyq jalaqysyn qaita qaraý. Barlyǵy ekonomika jaǵdaiyna bailanysty. Degenmen, barlyq esebi júrgizilip, biýdjetten kerek qarajat sanalǵan», - dedi ol.
Svetlana Jaqypovanyń mundai jaýabyna senatordyń kóńili tolmady.
«Sizdiń bul aitqanyńyz máseleni sheshpeidi. Sizder eń tómengi jalaqyny kóteremiz deisizder. Eń tómengi jalaqy kóterse barlyǵynyń ailyǵy kóteriledi. Al tómen alatyn adamdardyń jalaqysy sheshilmeidi. Bul rette biraq jol bar, ol - eń tómen jalaqy alatyn adamdardyń ailyǵyn birneshe ese kóterý», - dedi Asqar Beisenbaev.
