Foto: QR DSM
Pavlodarlyq 77 jastaǵy Tamara Sýslova – ómirlik jigeri myqty áiel. Ol ómirinde úsh ret onkologiialyq diagnozǵa tap bolyp, ár joly bul dertti sátti jeńe bildi, dep habarlaidy Ult.kz.
Alǵash ret oǵan bul diagnoz 20 jyl buryn qoiyldy: sút beziniń sirek kezdesetin Pedjet aýrýy. Sol kezde oǵan mastektomiia jasalyp, 10 kýrs sáýlelik terapiia júrgizildi. Ol moiymady, ómirin belsendi túrde jalǵastyrdy.
Keiin toq ishektiń qaterli isigi derti erte satysynda anyqtalyp, sátti alynyp tastaldy. Himioterapiiasyz ótti.
Arada on jyl ótkende jańa belgiler paida boldy: álsizdik, júrek ainý, 16 keli salmaq joǵaltý. Diagnoz – asqazan qaterligi isiginiń III satysy. Pavlodarlyq dárigerler operatsiiadan bas tartýǵa keńes berdi, al himioterapiia tym aýyr bolatyndai kórindi. Tamara Ivanovnanyń qyzy ony Koreiaǵa alyp ketti. Bir kýrs terapiia – 5 million teńge.
Qazaqstanǵa oralǵan soń qyzy emniń joldaryn ári qarai izdestirdi: moraldyq turǵyda qoldap, ony túrli shipaly oryndarǵa aparyp júrdi. Sheshim Astanadaǵy Ulttyq ǵylymi onkologiia ortalyǵynan tabyldy.
«Patsient bizge úshinshi onkologiialyq diagnozben, iaǵni asqazannyń qaterli isigimen keldi. Buǵan deiingi eki aýrý da sátti emdelgen. Kelgen kezdegi jaǵdaiy jaqsy boldy, onkologiia bar dep aita almaisyń. Óte pozitivti adam, ómirge qushtar, kúresker. Jeńiske senimdi boldy. Dieta saqtaidy, tártipti patsient», – deidi UǴOO abdominaldy hirýrgiia sektorynyń aǵa ordinatory Altai Kerimqulov.
Dárigerler HIPEC – gipertermiialyq ishperdelik himioterapiia tehnologiiasyn qoldanyp operatsiia jasaý týraly sheshim qabyldady. Operatsiia sátti ótti. 11-kúni patsient aýrýhanadan shyǵaryldy.
Himioterapiia oń nátije berip, isiktiń ishinara keri damýy baiqaldy. Immýndyq himioterapiianyń qaitalama kýrstary taǵaiyndaldy. UǴOO dárigerleri úmitpen qarap otyr.
«Qazirgi tańda bizdiń meditsinanyń deńgeii barlyq kómek túrin kórsetýge tolyq múmkindik beredi. Bul úshin shetelge shyǵýdyń qajeti joq. Koreiadaǵydai emdi biz de usyna alamyz», – deidi onkohirýrg.
HIPEC (Hyperthermic Intraperitoneal Chemotherapy) – joǵary tehnologiialy emshara, onyń barysynda operatsiia kezinde ish qýysyna qyzdyrylǵan himiopreparat eritindisi engiziledi. Ol shamamen bir jarym saǵat boiy ainalyp, kózge kórinbeitin isik qaldyqtaryn joiady. Bul ádis Qazaqstanda alǵash ret UǴOO-da engizilgen jáne patsientterdi emdeýde tabysty qoldanylyp keledi.
Tamara Ivanovna kúresin jalǵastyrýda. Ol úmitpen, senimmen ómir súrýde:
«Men: «Men ómir súrgim keledi», – deimin. Maǵan ne usynylsa, bárin jasaimyn. Men dárigerlerge úlken úmit artamyn. Bul – bizdiń ortaq isimiz. Al ortaq is – saýyǵýǵa alyp keledi».
