فوتو: قر دسم
پاۆلودارلىق 77 جاستاعى تامارا سۋسلوۆا – ٶمٸرلٸك جٸگەرٸ مىقتى ەيەل. ول ٶمٸرٸندە ٷش رەت ونكولوگييالىق دياگنوزعا تاپ بولىپ, ەر جولى بۇل دەرتتٸ سەتتٸ جەڭە بٸلدٸ, دەپ حابارلايدى Ult.kz.
العاش رەت وعان بۇل دياگنوز 20 جىل بۇرىن قويىلدى: سٷت بەزٸنٸڭ سيرەك كەزدەسەتٸن پەدجەت اۋرۋى. سول كەزدە وعان ماستەكتومييا جاسالىپ, 10 كۋرس سەۋلەلٸك تەراپييا جٷرگٸزٸلدٸ. ول مويىمادى, ٶمٸرٸن بەلسەندٸ تٷردە جالعاستىردى.
كەيٸن توق ٸشەكتٸڭ قاتەرلٸ ٸسٸگٸ دەرتٸ ەرتە ساتىسىندا انىقتالىپ, سەتتٸ الىنىپ تاستالدى. حيميوتەراپيياسىز ٶتتٸ.
ارادا ون جىل ٶتكەندە جاڭا بەلگٸلەر پايدا بولدى: ەلسٸزدٸك, جٷرەك اينۋ, 16 كەلٸ سالماق جوعالتۋ. دياگنوز – اسقازان قاتەرلٸگٸ ٸسٸگٸنٸڭ III ساتىسى. پاۆلودارلىق دەرٸگەرلەر وپەراتسييادان باس تارتۋعا كەڭەس بەردٸ, ال حيميوتەراپييا تىم اۋىر بولاتىنداي كٶرٸندٸ. تامارا يۆانوۆنانىڭ قىزى ونى كورەياعا الىپ كەتتٸ. بٸر كۋرس تەراپييا – 5 ميلليون تەڭگە.
قازاقستانعا ورالعان سوڭ قىزى ەمنٸڭ جولدارىن ەرٸ قاراي ٸزدەستٸردٸ: مورالدىق تۇرعىدا قولداپ, ونى تٷرلٸ شيپالى ورىندارعا اپارىپ جٷردٸ. شەشٸم استاناداعى ۇلتتىق عىلىمي ونكولوگييا ورتالىعىنان تابىلدى.
«پاتسيەنت بٸزگە ٷشٸنشٸ ونكولوگييالىق دياگنوزبەن, ياعني اسقازاننىڭ قاتەرلٸ ٸسٸگٸمەن كەلدٸ. بۇعان دەيٸنگٸ ەكٸ اۋرۋ دا سەتتٸ ەمدەلگەن. كەلگەن كەزدەگٸ جاعدايى جاقسى بولدى, ونكولوگييا بار دەپ ايتا المايسىڭ. ٶتە پوزيتيۆتٸ ادام, ٶمٸرگە قۇشتار, كٷرەسكەر. جەڭٸسكە سەنٸمدٸ بولدى. ديەتا ساقتايدى, تەرتٸپتٸ پاتسيەنت», – دەيدٸ ۇعوو ابدومينالدى حيرۋرگييا سەكتورىنىڭ اعا ورديناتورى التاي كەرٸمقۇلوۆ.
دەرٸگەرلەر HIPEC – گيپەرتەرمييالىق ٸشپەردەلٸك حيميوتەراپييا تەحنولوگيياسىن قولدانىپ وپەراتسييا جاساۋ تۋرالى شەشٸم قابىلدادى. وپەراتسييا سەتتٸ ٶتتٸ. 11-كٷنٸ پاتسيەنت اۋرۋحانادان شىعارىلدى.
حيميوتەراپييا وڭ نەتيجە بەرٸپ, ٸسٸكتٸڭ ٸشٸنارا كەرٸ دامۋى بايقالدى. يممۋندىق حيميوتەراپييانىڭ قايتالاما كۋرستارى تاعايىندالدى. ۇعوو دەرٸگەرلەرٸ ٷمٸتپەن قاراپ وتىر.
«قازٸرگٸ تاڭدا بٸزدٸڭ مەديتسينانىڭ دەڭگەيٸ بارلىق كٶمەك تٷرٸن كٶرسەتۋگە تولىق مٷمكٸندٸك بەرەدٸ. بۇل ٷشٸن شەتەلگە شىعۋدىڭ قاجەتٸ جوق. كورەياداعىداي ەمدٸ بٸز دە ۇسىنا الامىز», – دەيدٸ ونكوحيرۋرگ.
HIPEC (Hyperthermic Intraperitoneal Chemotherapy) – جوعارى تەحنولوگييالى ەمشارا, ونىڭ بارىسىندا وپەراتسييا كەزٸندە ٸش قۋىسىنا قىزدىرىلعان حيميوپرەپارات ەرٸتٸندٸسٸ ەنگٸزٸلەدٸ. ول شامامەن بٸر جارىم ساعات بويى اينالىپ, كٶزگە كٶرٸنبەيتٸن ٸسٸك قالدىقتارىن جويادى. بۇل ەدٸس قازاقستاندا العاش رەت ۇعوو-دا ەنگٸزٸلگەن جەنە پاتسيەنتتەردٸ ەمدەۋدە تابىستى قولدانىلىپ كەلەدٸ.
تامارا يۆانوۆنا كٷرەسٸن جالعاستىرۋدا. ول ٷمٸتپەن, سەنٸممەن ٶمٸر سٷرۋدە:
«مەن: «مەن ٶمٸر سٷرگٸم كەلەدٸ», – دەيمٸن. ماعان نە ۇسىنىلسا, بەرٸن جاسايمىن. مەن دەرٸگەرلەرگە ٷلكەن ٷمٸت ارتامىن. بۇل – بٸزدٸڭ ورتاق ٸسٸمٸز. ال ورتاق ٸس – ساۋىعۋعا الىپ كەلەدٸ».
