Senattyń jalpy otyrysynda QR «Tolyq emes jumys ýaqyty jaǵdailaryndaǵy jumys týraly konventsiiany (175-konventsiia) ratifikatsiialaý týraly» Zańy qabyldandy, dep habarlaidy QazAqparat.
Atalǵan qujat 2019 jylǵy 18 qazanda Qazaqstan Respýblikasynyń halyqaralyq sharttar máseleleri jónindegi vedomstvoaralyq komissiianyń otyrysynda qoldaý tapty.
«Tolyq emes jumys ýaqyty jaǵdaiyndaǵy jumys týraly konventsiia 1994 jylǵy 24 maýsymda Halyqaralyq Eńbek Uiymynyń Bas konferentsiiasynda qabyldandy. Konventsiia tolyq emes jumys ýaqytynda jumys isteitin jumyskerlerdiń quqyqtary men múddelerin, iaǵni ujymdyq kelissózder júrgizý quqyǵy, eńbek qaýipsizdigi jáne eńbekti qorǵaý, ananyń quqyǵyn qorǵaý, jyl saiynǵy aqyly demalys berý, eńbek jáne jumyspen qamtý salasynda kemsitýshilikke jol bermeý máselelerin tolyq jumys ýaqytynda jumys isteitin jumyskerlerdiń quqyqtary siiaqty qorǵaýdy kózdeidi», – dedi QR Eńbek jáne halyqty áleýmettik qorǵaý ministri Serik Shápkenov.
Osy Konventsiia qyzmetkerler men kásiporyndardyń jekelegen sanattaryn qospaǵanda, ekonomikalyq qyzmettiń barlyq salalaryna qoldanylady (Konventsiianyń 3-baby).
Ulttyq statistika biýrosynyń málimetterine qaraǵanda, 2021 jyldyń 4-toqsanynyń qorytyndysy boiynsha ártúrli salalardaǵy 470 myńǵa jýyq qyzmetker tolyq emes jumys ýaqyty rejiminde jumys istedi. Olardyń jartysyna jýyǵy aptasyna 20 saǵattan az ýaqyt jumys istedi. Olardyń kópshiligi aýyl sharýashylyǵy, bilim jáne ónerkásip salalarynda eńbek etti.
Konventsiiaǵa sáikes «tolyq emes jumys ýaqytynda jumys isteitin» degen termin tolyq jumys ýaqytynda jumys isteitin jáne salystyrmaly jaǵdaida bolatyn qyzmetkerdiń jumys ýaqytynyń qalypty uzaqtyǵynan az jumys isteitin jumyskerdi bildiredi.
Konventsiia aiasynda tolyq emes jumys ýaqytynda jumys isteitin qyzmetkerlerdiń negizgi jalaqysy sol ádistermen esepteletin tolyq jumys ýaqytynda jumys isteitin jáne salystyrmaly jaǵdaidaǵy qyzmetkerlerdiń negizgi jalaqysynan kem bolmaýy tiis dep kózdelgen.
Óz kezeginde Konventsiiaǵa uqsas ulttyq eńbek zańnamasynda qyzmetkerlerge eńbekaqy tóleý salasyndaǵy memlekettik kepildikter qarastyrylǵan. Sondai-aq qujatta tolyq emes jumys ýaqytynda jumys isteitin qyzmetkerlerge arnalǵan áleýmettik qamsyzdandyrý júieleri tolyq jumys ýaqytynda jumys isteitin qyzmetkerlerge uqsas bolýy kerek. Bul sharttar jumys ýaqytynyń uzaqtyǵyna, jarnalarǵa nemese kiristerge proportsionaldy túrde anyqtalýy múmkin. Osyǵan uqsas Ulttyq eńbek jáne áleýmettik zańnama tolyq jumys ýaqytynda jumys isteitin qyzmetkerlermen salystyrǵanda tolyq emes jumys ýaqytynda jumys isteitin qyzmetkerlerdiń quqyqtaryn shektemeitinin atap ótken jón.
«Konventsiiany ratifikatsiialaý memlekettik biýdjetten teris áleýmettik-ekonomikalyq saldarlar men qarjylyq shyǵyndarǵa alyp kelmeidi. Konventsiiany qabyldaý tolyq emes jumys ýaqytynda jumys isteitin qyzmetkerlerdi kemsitý bóliginde eńbek daýlaryna ákelmeidi dep oilaimyz. Bul rette Konventsiiany qabyldaý jumys isteitin azamattardyń eńbek quqyqtaryn qorǵaýdy qamtamasyz etedi jáne Qazaqstannyń osy saladaǵy halyqaralyq normalardy saqtaý men oryndaýǵa beiildiligin rastaidy», – dedi ministr.
