Dáýren Áskerbekuly, qoǵam ózińizdi memlekettik ideologiiaǵa jaýapty tulǵa retinde biledi. El damýy jolyndaǵy qairatkerlik qyzmetińizden de habardarmyz. Biraq keshe ǵana Aleksandr Trýhachev esimdi jýrnaliske bergen suhbatyńyzda qazaq tiline qatysty aitqanyńyzdy kórip, qolǵa qalam alýǵa bekindim. Suhbatta aitylǵan jaittardy túiindei kele, mende mynadai úsh suraq týyndap otyr:
1. El azamattarynyń 20 paiyzy ǵana orys bolǵanymen, ózińiz aitqandai, el azamattarynyń 90 paiyzy áli de oryssha bilýi jáne balalardyń 30 paiyzy oryssha oqýy masqara emes pe? Kerisinshe, bul egemendik alǵanymyzǵa 30 jyl ótse de, qazaq tili memlekettik til degen mártebeli tuǵyryna qona almai otyrǵanynyń kórinisi emes pe?
2. Dáýke, suhbatta aitylǵan «peshernyi natsionalizm» degen anyqtamany jete túsinbedim. Ana tilge degen janashyrlyq, onyń bolashaǵyna degen alańdaýshylyq bárimizde de bar. Sonda bárimiz de osy sanatqa jatamyz ba?
3. Búginde qoǵamda qazaq tili – ultaralyq qarym-qatynas tiline ainalýy kerek degen pikir ornyǵyp keledi. Alaida qazirgidei qalpymyzben biz memlekettik tildiń jaǵdaiyn qalai, qaitip jáne qashan durystaimyz? Buǵan qatysty bilik basyndaǵylardyń ne oilaǵany bar?
Mundai suraqtar jalǵyz mende emes, qazaq tili men tól rýhaniiatymyzǵa jany ashityn ár azamatta týyndady ǵoi degen senimdemin. Qalyń qazaqtyń atynan joldaǵan saýal dep qabyldaǵaisyz.
Qurmetpen, Maraltai Raiymbekuly
Aqyn, Halyqaralyq «Alash» syilyǵynyń laýreaty
