Jetisý oblysynyń Densaýlyq saqtaý basqarmasy tasjolda órtendi degen jedel járdem kóligine qatysty oqiǵanyń mán-jaiyn aityp berdi, - dep habarlaidy Massaget.kz portaly.
Buǵan deiin politsiia Almaty-Óskemen tasjolynda tolǵatqan áieldi alyp bara jatqan jedel járdem kóligi órtengenin habarlaǵan edi. Jaqyn mańdaǵy politsiianyń avtopatrýl qyzmeti júkti áieldi aýrýhanaǵa jetkizgen. Polisia.kz málimetinshe, jedel járdem kóligi ári qarai jete almaǵan.
"Dárigerler Qabanbai aýylynan tolǵaǵy qysyp, aýyrǵan júkti naýqasty Úsharal qalasyna jetkizbek bolǵany belgili boldy. Bizdiń qyzmetkerler Aidyn Ǵazizov pen Daniiar Jaqsygeldinov áieldi dereý politsiia patrýline salyp, aýrýhanaǵa jetkizdi, oǵan qajetti kómek kórsetildi", - dedi Jetisýǵa oblystyq Politsiia departamenti PPB bastyǵynyń orynbasary Abylai Berkendikov.
Alaida Densaýlyq saqtaý basqarmasy ókilderi basqa málimet aitty. Olardyń aitýynsha, kólikte órt bolmaǵan. Olardyń málimeti boiynsha, 36 jastaǵy júkti áieldi Alakól ortalyq aýdandyq aýrýhanasyna jetkizý kezinde jol politsiiasynyń qyzmetkerleri sanitarlyq kólikti Úsharal qalasyndaǵy kópir aldyndaǵy saqinada gaz shyǵaratyn tútikten tútin shyqqandyǵyna bailanysty toqtatqan.
"Avtokólikti tekserý kezinde onyń sebebi anyqtaldy. Berilis qorabynyń tyǵyzdaǵyshynan maidyń aǵýy anyqtalyp, joiyldy. Órt belgileri men elektr symdary, boiaý jáne qozǵaltqysh bólikteriniń zaqymdanýy anyqtalǵan joq. Jol politsiiasynyń bastamasymen júkti áiel ýchaskelik dáriger men akýsherdiń baqylaýymen Alakól ortalyq aýrýhanasyna jetkizildi", - dedi dárigerler.
Keiinirek júrgizýshi aýdandyq ortalyq aýrýhanaǵa barǵan. Onda kólikti qosymsha aýrýhananyń aǵa mehanigi teksergen.
"Órt belgileri, aqaýlar tabylmady, soǵan bailanysty jol júrý jalǵasty. Qaitar jolda Kógirim asýynda olardy jol politsiiasy qyzmetkerleri toqtatyp, olardyń bastamasy men usynystary boiynsha jazba jasalǵan. Qyzmetkerler dittegen jerine aman-esen jetti", - dep tolyqtyrdy Jetisý oblysynyń Densaýlyq saqtaý basqarmasy ókilderi.
