«Aýyl» partiiasy atynan prezidenttikke kandidat Tóleýtai Raqymbekov Mańǵystaý jurtshylyǵyna sailaýaldy baǵdarlamasyn tanystyrdy, dep habarlaidy partiianyń baspasóz qyzmeti.
Prezidenttikke úmitker jergilikti turǵyndarmen kezdesý barysynda aimaqqa tán máselelerdi kóterip, ony sheshý joldaryn usyndy. Ol Mańǵystaý óńirine kúndelikti tutynatyn azyq-túliktiń basym bóligi basqa aimaqtardan ákelinetinin sóz etip, bul máseleni sheshý úshin aýyl-aimaqta jylyjaidy kóbeitý kerektigin alǵa tartty. Buǵan qosa, shubat óndirisin jolǵa qoiyp, tabys kólemin eselep arttyrýǵa bolatynyn aitty. Óitkeni, osy tektes bastamalarǵa qazir memleketten jaqsy qoldaý bar.
Jiynda sonymen qatar jumyssyzdyq, aýyl sharýashylyǵyn jandyrý, baspanamen qamtý, infraqurylymdy damytý jáne jastar saiasaty sekildi problemalar kóterilip, keńinen talqylandy.
