«Ulttyq agrarlyq ǵylymi-bilim berý ortalyǵy» KEAQ basqarma tóraǵasy Tóleýtai Raqymbekov aýyl sharýashylyǵy salasynda ǵylymi zertteýlerdi tájiribe júzinde iske asyrý baǵyty týraly aityp berdi, dep habarlaidy "Ult aqparat".
«Memleket basshysy ǵylymdaǵy jaǵdaiǵa, onyń tiimdiligine, ǵylymi zertteýlerdiń deńgeiin arttyrýǵa jáne olardyń tájiribe júzinde paidalaný baǵytyna airyqsha nazar aýdardy. Biz agrarlyq ǵylym problemalaryna taldaý jasap, olardy sheshý joldaryn belgilip, jaqynda Aýyl sharýashylyǵy ministrligindegi keńeste baiandadyq. Bir jaǵynan alyp qaraǵanda, bizde ǵylymi bai mura bar, sondai-aq otandyq agrarlyq ǵylymmen júrgizilgen jumystarǵa laiyqty baǵasyn berý kerek. Bizde ǵylym bar jáne tájiribeli nátijege jumys istei alady. Alaida qazirgi kezde moiyndaýymyz kerek, bul saladaǵy tiimdilik tiisti deńgeide emes. Ekinshi jaǵynan qaraǵanda, ǵylym biznes qajettiliginen ajyrap qalǵan. Ǵylymi-tehnikalyq qyzmet nátijeleriniń tek 8 paiyzy óndiriske engiziledi», - dedi ol Prezidenttiń Qazaqstan halqyna Joldaýynyń alǵashqy nátijeleri týraly ǵylymi-praktikalyq konferentsiia barysynda.
T. Raqymbekovtyń sózine qaraǵanda, basty problema – ol óndiriske ǵylymi zertteýler nátijelerin ilgeriletýge yqpal etetin infraqurylymnyń, innovatsiialyq júieniń tiisti deńgeide bolmaýy. Kadrlyq problemalar da bar.
Sonymen qatar ol ministrlikte ótken keńeste atqarylǵan jumystyń alǵashqy nátijeleri baiandalǵanyn jáne birqatar usynystar engizilgenin atap ótti.
«Birinshiden, ósimdik sharýashylyǵynda roialti engizý boiynsha jumys bastaldy. 100 mln teńgeden astam somaǵa 32 litsenziialyq shart bekitildi, onyń ishinde 30 paiyzy zańnamaǵa sáikes ǵalymǵa tólenýi tiis. Keńeste astyq tuqymdastary suryptarynyń avtorlaryna sertifikattar tabystaldy», - dedi ol.
Osy oraida T. Raqymbekov roialtidiń jalpy somasy jylyna 10 mlrd teńgege jetýi múmkin ekenin atap ótti. Sonyń ishinde 3 mlrd teńgesi ǵalymdarǵa tiesili bolady. Bul rette ǵylymi qyzmetkerlerdiń eńbegin yntalandyrýdy arttyrý eskerilip otyr.
«Qalǵan 7 mlrd teńge jańa ǵylymi zertteýlerdi qarjylandyrýǵa baǵyttalmaq. Roialti júiesi taýar óndirýshilerdiń sapaly tuqymdy paidalanýyn baqylaýdyń negizi bolýy múmkin. Bul óz kezeginde ónimniń shyǵymdylyǵynyń sapasy men kólemine ońtaily áser etedi», - dedi «Ulttyq agrarlyq ǵylymi-bilim berý ortalyǵy» KEAQ basqarma tóraǵasy.
