Tólebi aýdanynda «KazahBitým» JShS-niń munai ónimderin óńdeý zaýytyndaǵy úzdiksiz polimerdi modifikatsiialaý tsehy ashyldy.
Kielitas aýyldyq okrýgi aýmaǵynda ornalasqan zaýyt jylyna 200 myń tonnadan astam ónim óndirýge qaýqarly. Joba quny – 550 mln. teńge. Tsehta jol jóndeý jumystaryna qoldanylatyn erekshe qospa óndiriledi. Túrkistan oblysynyń ákimi Darhan Satybaldy arnaiy jumys saparymen Tólebi aýdanynda bolyp, jańa óndiris ornynyń ashylý rásimine qatysty.
«El Prezidenti Qasym-Jomart Toqaev biylǵy Joldaýynda kásipkerlik salasyn tiisti infraqurylymmen qamtamasyz etýdi tapsyrdy. Búginde oblysta atalǵan máseleler boiynsha jumystar júrgizilip jatyr. Memleket basshysynyń «10 myń turǵynǵa 100 turaqty jumys oryndaryn ashý» jónindegi tapsyrmasyna sáikes, oblysymyzda 10 myńnan astam jańa jumys oryndaryn ashý josparlanýda. Sonymen qatar Prezident avtojol qurylysyna, sonyń ishinde jergilikti joldardyń sapasyna basa mán berý kerektigin aitqan bolatyn. 2025 jylǵa deiin joldardyń keminde 95 paiyzyn jaqsartý jóninde tapsyrma berdi. Bizde áli kúnge deiin bitým tapshylyǵy bar. Aýdan aýmaǵynda jumys istep turǵan zaýyttyń jumysyn jandandyrý arqyly oblysymyzda osy máseleni sheshemiz. Búgin iske qosylǵan polimerdi modifikatsiialaý tsehynyń mańyzy joǵary. Osyndai iri zaýyttarymyz kóbeie bersin», – dedi Darhan Satybaldy.
Bitým ártúrli jol jumystarynda keńinen qoldanylady. Ónimniń bir ereksheligi, aýa-raiynyń kez-kelgen temperatýrasyna beiimdiligi. Bitým jol tósenishiniń birkelkiligin jáne túrli deformatsiialanýdan saqtaidy. Polimerli bitýmdy paidalanatyn asfaltbeton qospasy joldy tozyp ketýden qorǵaidy. Tsehta jergilikti turǵyndar turaqty jumyspen qamtylǵan.
Issapar barysynda oblys ákimi Birinshi Mamyr aýyldyq okrýginde ornalasqan «Balmuzdaq» jaýapkershiligi shekteýli seriktestiginde boldy. Balmuzdaq tsehy 1998 jyldan beri jumys isteidi. Kásiporyn jylyna 3 myń tonnaǵa jýyq balmuzdaq, 15 tonna tushpara, jarty million tonnadan astam shokolad ónimderin óndiredi. 200-ge jýyq adam turaqty jumyspen qamtylǵan. Keler jyly 1 mln. 300 myń evroǵa Avstriiadan balmuzdaq tsehyna qural-jabdyqtar alyp, ornatylmaq.
