Tólebi – tabiǵaty men klimattyq múmkindikteri týrizm salasyn damytýǵa qolaily aýdan. Óńirde qazirgi tańda 1 shańǵy bazasy, 4 emdik-saýyqtyrý orny, 71 demalys aimaǵy, 64 saiajai bar. Atalǵan demalys oryndaryna 2022 jyldyń 10 aiynda 32 myńnan asa adam kelgen.
Aýdanda negizgi kapitalǵa baǵyttalǵan investitsiialar kólemi 2022 jyldyń 10 aiynda 14 mlrd 624 mln teńgeni qurap, ótken jyldyń tiisti kezeńimen salystyrǵanda 1 mlrd 128 mln. teńgege artqan. Al týrizm salasyna jyldyń sońyna deiin 3 mlrd 757 mln teńge investitsiia tartylyp, 25 jumys orny ashylady dep josparlanyp otyr.
Biyl «Biznestiń jol kartasy - 2025» baǵdarlamasy men «Kásipkerlik qyrandary» jobasy arqyly qarjylandyrý nátijesinde jeke kásipker E.Espenbetova Dihankól eldimekeninde quny 57 mln teńge bolatyn «Dihan Taý» saýmalmen saýyqtyrý ortalyǵyn iske qosqan. Keshen bir mezgilde 25 otbasyn qabyldaidy.
Sondai-aq, Kóksáiek aýyldyq okrýginde «Saq» demalys aimaǵynyń qurylysy júrgizilýde. Qazirgi tańda balyq sharýashylyǵy, tamaqtaný qyzmeti jáne saq monshasy iske qosylǵan. Balyq sharýashylyǵynda 3 kól bar.
Sonymen qatar, Kemeqalǵan aýyldyq okrýginde ornalasqan «Alma-taý» taý kýrortynda qosymsha qonaqúi jáne sport kesheniniń qurylysy júrgizilip jatyr. Nysan qurylysy biyl aiaqtalyp, paidalanýǵa berilmek. Jobanyń quny - 2 mlrd 650 mln teńge.
Aýdanda taý týrizmin damytý maqsatynda «Qasqasý týristik-rekreatsiialyq kesheniniń» jobasyn júzege asyrý maqsatynda 2022 jylǵa infraqurylym júrgizý úshin oblystyq biýdjetten 1 mlrd 50 mln teńge qarjy qarastyrylǵan. Qazirgi tańda jol salý, elektr jelilerin tartý jumystary júrgizilip jatyr.
