Túrkistan oblysynyń Tólebi aýdanyndaǵy demalys aimaqtarǵa aparar joldar jóndeýden ótkizildi, dep habarlaidy «Ult aqparat» oblys ákimdiginiń baspasóz qyzmetine silteme jasap.
Túrkistan oblysynyń jolaýshylar kóligi jáne avtomobil joldary basqarmasy oblystyq mańyzy bar joldardyń jóndeý jumystaryn negizgi 3 baǵytta iske asyrýda. Máselen, Tólebi aýdanyndaǵy jalpy uzyndyǵy 18 shaqyrymdy quraityn týristik baǵyttaǵy 3 jolǵa ortasha jóndeý jumystary júrgizildi. Atap aitqanda, oblystyq mańyzy bar KH-31 «Qasqasý qysqy demalys aimaǵy» avtomobil jolynyń 10,2 shq jáne KH-170 «Birkólik sanatoriiasyna kirme jol» avtomobil jolynyń 6,2 shaqyrymy jóndeýden ótkizilip, paidalanýǵa berildi.
Bekitilgen smetalyq kujattamaǵa sáikes, eskirgen asfalt jabyny tolyǵymen jańartylyp, aiaq joldar salyndy. Sondai-aq, taýly aimaqtarda kólikterdiń qaýipsizdigin qamtamasyz etý maqsatynda temir dóńgelekqaǵarlar jáne eldi mekenderge diodty jaryqtandyrý shamdary ornatyldy.
Budan bólek, jol tańbalary syzylyp, tiisti jol belgilerimen qamtyldy. Taýly aimaqta jaýyn-shashyn kezinde asfalt jabyndysyn sý shaiýdan saqtaý maqsatynda 14 jerde sý ótkizgish qubyrlar aýystyrylyp, sýaǵarlar ornatyldy. Aita keteiik, buǵan deiin oblystyq mańyzy bar KH-93 «Keńesaryq-Qasqasý – Maibulaq» (1,6 shq) avtomobil joly jóndeýden ótip, paidalanýǵa berilgen bolatyn.
