Biznesmen Toqtar Tóleshovke tiesili sáigúlikter sport jarystaryna daiyndalyp jatyr, dep habarlaidy sputniknews.kz agenttigi "Astana" telearnasyna silteme jasap.
Tárkilengen tulparlardy Ońtústik Qazaqstan oblystyq ulttyq sport túrleri boiynsha mamandandyrylǵan balalar-jasóspirimder sport mektebinde jattyqtyryp jatyr.
Ekstremizm men basqa da qylmystar úshin jazasyn ótep jatqan Tóleshovtiń tórt sáigúligi konkýrdy meńgerýde. Bapkerler Elastik esimdi aǵylshyn-trakenen tuqymdy tulparǵa úmit artyp otyr. Bul jylqy Aziia birinshiliginde jeńiske jetken, Qazaqstannyń birneshe dúrkin chempiony ataǵyna ie.
Al aiaǵy synǵan Razbrod taza qandy aǵylshyn sáigúligin Shymkent zoobaǵynyń qyzmetkerleri soiyp alypty. Maldyń eti haiýanattar baǵy qyzmetkerlerine satyldy. Ettiń bir kelisi myń teńgeden tómen baǵaǵa ótkizilgen.
Buǵan deiin zoobaqta Toqtar Tóleshovke tiesili aiý ólip qalǵan bolatyn.
2016 jyldyń qarashasynda sot úkimimen Shymkent syra qainatý zaýytynyń qojaiyny Toqtar Tóleshov qatań rejimdi koloniiada jazasyn óteýmen 21 jylǵa bas bostandyǵynan aiyryldy. Tóleshov kisi óltirý, urlaý, adamdardy zańsyz bas bostandyǵynan aiyrý; transulttyq qylmystyq qoǵamdastyq qurý jáne basqarý; qylmystyq uiymdy basqarý; sondai-aq ekstremistik top quryp, oǵan jetekshilik etý qylmysy boiynsha aiypty dep tanylǵan edi.
"Syra koroliniń" tárkilengen múlkiniń ishinde 8 jer telimi men 4 kottedj Shymkent ákimdiginiń menshigine ótti. Eki kottedj óner mektepterin ashý úshin bilim bólimine tapsyryldy.
