Shymkenttiń Eńbekshi aýdandyq soty biznesmen Toqtar Tóleshovti "ekonomikalyq qylmystar jasady" dep aiyptap, bes jylǵa sottady.
Azattyq tilshisiniń sottan habarlaýynsha, sýdia Myrzaly Jorabaev "Shymkent syra" zaýytynyń burynǵy basshysy Tóleshovti Qylmystyq kodekstiń 245-baby 2 jáne 3-bóligi ("Uiymdarǵa salynatyn salyqty jáne (nemese) biýdjetke tólenetin basqa da mindetti tólemderdi tóleýden jaltarý"), 250-baby ("Ókilettigin teris maqsatta paidalaný") boiynsha aiypty dep tanyp, bes jylǵa bas bostandyǵynan aiyrý jazasyn kesti. Sýdia Tóleshovtiń bul bes jylyn buǵan deiin sottalǵan jazasyna kiriktirip jiberýge, iaǵni alǵashqy qylmysy boiynsha kesilgen 21 jylǵa qosyp, sonyń ishinde óteýge úkim kesti.
Tóleshov sotta ózine taǵylǵan aiypty moiyndamaitynyn málimdep, úkimge apelliatsiialyq shaǵym beretinin aitty.
"Shymkent syra" zaýytynyń iesi bolǵan kásipker Toqtar Tóleshov 2016 jyly qańtardyń 30-ynda Shymkent qalasynda politsiia júrgizgen jedel-izdestirý sharasynda ustalǵan. Biznesmenge qylmystyq kodekstiń 266-baby ("Qylmystyq toptyń áreketin qarjylandyrý, sol siiaqty múlikti saqtaý, bólý, qarjylandyrý arnalaryn ázirleý") jáne 297-baby ("Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý") boiynsha aiyptar taǵylǵan. Toqtar Tóleshov "zańsyz qarý saqtap jáne ustaǵanyn" ǵana moiyndaǵan.
2016 jyly qarashanyń 7-si kúni Astanadaǵy mamandandyrylǵan aýdanaralyq áskeri sot Toqtar Tóleshovti 21 jylǵa bas bostandyǵynan aiyrýǵa, jazasyn qatań rejimdegi koloniiada óteýge, dúnie-múlkin tárkileýge, memlekettik marapattarynan aiyrýǵa úkim kesken.
Toqtar Tóleshovtiń isine bailanysty sotqa tartylǵan 24 adamnyń birazy da túrme jazasyna kesilgen.
