Búgin Almaty qalasyndaǵy Ortalyq tsirk mańynda qaiǵyly oqiǵa boldy. Tsirk janyndaǵy fontan sýynda úsh adam toqqa túsip qaldy. Olardy sýdan Abylai esimdi jigit pen esimi belgisiz taǵy bir azamat alyp shyqqan.
Endeshe, biz "Adyrna" portalynyń sol batyl azamattardyń birimen júrgizgen qysqasha suhbattyn usynamyz.
- Armysyz Abylai. Búgingi erligińizdi kórip, ózińizge súisinip otyrmyz. Adam ómirin qutqaryp qalǵanyńyzǵa alǵys bildiremiz. Jalpy ózińiz jaily qysqasha aita ketseńiz. Jasyńyz neshede? Qaida oqisyz nemese jumys isteisiz?
Assalaýmaǵaleikým. Meniń aty-jónim Balapanov Abylai. Jasym 19-da. Qazirgi tańda Almaty qalasyndaǵy Q. I. Sətbaev atyndaǵy Qazaq Ulttyq Tehnikalyq Zertteý Ýniversitetiniń, "Avtomattandyrý jáne basqarý" mamandyǵynyń ekinshi kýrs stýdentimin. Týǵan jerim Ile aýdany, Baiserke aýyly.
- Búgingi oqiǵa jaily tolyǵyraq aityp berseńiz. Ortalyq tsirk mańynda ne boldy? Ózińizdi de toq soǵyp, álsirep qalǵanyńyzdy oqydym. Qazir densaýlyǵyńyz qalai?
Búgin Ortalyq tsirk mańyndaǵy oqiǵa jaily tolyǵyraq aitar bolsam oqiǵa bylai boldy. Tsirk mańynda jastary 8-10 shamasyndaǵy qyzdar men olardyń anasy toqqa túsip qaldy. Fontannyń toǵyna. Adamdardyń aiǵailaǵan daýysy shyǵyp, kómekke shaqyryp jatty. Men ol sátte sol mańdaǵy oryndyqta demalyp otyrǵan edim. Ornymnan turyp, ne bolǵanyn kóreiin dedim. Jaqyndap qarasam sumdyq kórinisti kórdim. Anasy men balasy toqqa túsip jatyr eken. Oilanbastan qutqarýǵa kiristim. Fontanǵa kirip, anasyn alyp shyqtym. Ekinshi márte qyzyna barǵanymda meni de toq urdy. Qyzyn basqa, beitanys azamat alyp shyqty. Toqqa taǵy bir qyz túsken edi, alaida toq kúshi álsiz bolyp, ol qyz ózi shyǵa aldy. Men de fontan ishinen ózim syrtqa shyqtym. Qazir densaýlyǵym jaman emes. Oqiǵadan keiin úige qaityp kettim.
- Toq soqqan qyzdy basqa jan alyp shyqqanyn aittyńyz. Ol azamat jaily qandai da bir aqparat bilesiz be?
Iá, basqa azamat alyp shyqty. Ókinishke orai ol azamattyń aty-jónin bilmeimin, aqparat ta joq.
- Quzyrly organdar tarapynan qandai áreket jasaldy? Bilik organdary habarlasyp, hal-jaǵdaiyńyzdy bildi ma?
Sol mańda politsiia qyzmetkerleri júrdi. Olar meniń hálimdi surady. Olarǵa da óz alǵysymdy bildirgim keledi.
- Bul áreketińiz - erlik. Ózińizdi batyr sanaisyz ba?
Joq, men ózimdi batyr sanamaimyn. Bul meniń adamdyq mindetim. Sol mindetimdi atqardym.
- Aman bol, Abylai! Ómirde barlyq arman-maqsattaryń iske asyp, oryndalsyn. Batyr degen atqa laiyqsyń.
Suhbattasqan Ashat Qasenǵali
