بٷگٸن الماتى قالاسىنداعى ورتالىق تسيرك ماڭىندا قايعىلى وقيعا بولدى. تسيرك جانىنداعى فونتان سۋىندا ٷش ادام توققا تٷسٸپ قالدى. ولاردى سۋدان ابىلاي ەسٸمدٸ جٸگٸت پەن ەسٸمٸ بەلگٸسٸز تاعى بٸر ازامات الىپ شىققان.
ەندەشە, بٸز "ادىرنا" پورتالىنىڭ سول باتىل ازاماتتاردىڭ بٸرٸمەن جٷرگٸزگەن قىسقاشا سۇحباتتىن ۇسىنامىز.
- ارمىسىز ابىلاي. بٷگٸنگٸ ەرلٸگٸڭٸزدٸ كٶرٸپ, ٶزٸڭٸزگە سٷيسٸنٸپ وتىرمىز. ادام ٶمٸرٸن قۇتقارىپ قالعانىڭىزعا العىس بٸلدٸرەمٸز. جالپى ٶزٸڭٸز جايلى قىسقاشا ايتا كەتسەڭٸز. جاسىڭىز نەشەدە? قايدا وقيسىز نەمەسە جۇمىس ٸستەيسٸز?
اسسالاۋماعالەيكۋم. مەنٸڭ اتى-جٶنٸم بالاپانوۆ ابىلاي. جاسىم 19-دا. قازٸرگٸ تاڭدا الماتى قالاسىنداعى ق. ي. سəتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتٸنٸڭ, "اۆتوماتتاندىرۋ جەنە باسقارۋ" ماماندىعىنىڭ ەكٸنشٸ كۋرس ستۋدەنتٸمٸن. تۋعان جەرٸم ٸلە اۋدانى, بايسەركە اۋىلى.
- بٷگٸنگٸ وقيعا جايلى تولىعىراق ايتىپ بەرسەڭٸز. ورتالىق تسيرك ماڭىندا نە بولدى? ٶزٸڭٸزدٸ دە توق سوعىپ, ەلسٸرەپ قالعانىڭىزدى وقىدىم. قازٸر دەنساۋلىعىڭىز قالاي?
بٷگٸن ورتالىق تسيرك ماڭىنداعى وقيعا جايلى تولىعىراق ايتار بولسام وقيعا بىلاي بولدى. تسيرك ماڭىندا جاستارى 8-10 شاماسىنداعى قىزدار مەن ولاردىڭ اناسى توققا تٷسٸپ قالدى. فونتاننىڭ توعىنا. ادامداردىڭ ايعايلاعان داۋىسى شىعىپ, كٶمەككە شاقىرىپ جاتتى. مەن ول سەتتە سول ماڭداعى ورىندىقتا دەمالىپ وتىرعان ەدٸم. ورنىمنان تۇرىپ, نە بولعانىن كٶرەيٸن دەدٸم. جاقىنداپ قاراسام سۇمدىق كٶرٸنٸستٸ كٶردٸم. اناسى مەن بالاسى توققا تٷسٸپ جاتىر ەكەن. ويلانباستان قۇتقارۋعا كٸرٸستٸم. فونتانعا كٸرٸپ, اناسىن الىپ شىقتىم. ەكٸنشٸ مەرتە قىزىنا بارعانىمدا مەنٸ دە توق ۇردى. قىزىن باسقا, بەيتانىس ازامات الىپ شىقتى. توققا تاعى بٸر قىز تٷسكەن ەدٸ, الايدا توق كٷشٸ ەلسٸز بولىپ, ول قىز ٶزٸ شىعا الدى. مەن دە فونتان ٸشٸنەن ٶزٸم سىرتقا شىقتىم. قازٸر دەنساۋلىعىم جامان ەمەس. وقيعادان كەيٸن ٷيگە قايتىپ كەتتٸم.
- توق سوققان قىزدى باسقا جان الىپ شىققانىن ايتتىڭىز. ول ازامات جايلى قانداي دا بٸر اقپارات بٸلەسٸز بە?
يە, باسقا ازامات الىپ شىقتى. ٶكٸنٸشكە وراي ول ازاماتتىڭ اتى-جٶنٸن بٸلمەيمٸن, اقپارات تا جوق.
- قۇزىرلى ورگاندار تاراپىنان قانداي ەرەكەت جاسالدى? بيلٸك ورگاندارى حابارلاسىپ, حال-جاعدايىڭىزدى بٸلدٸ ما?
سول ماڭدا پوليتسييا قىزمەتكەرلەرٸ جٷردٸ. ولار مەنٸڭ حەلٸمدٸ سۇرادى. ولارعا دا ٶز العىسىمدى بٸلدٸرگٸم كەلەدٸ.
- بۇل ەرەكەتٸڭٸز - ەرلٸك. ٶزٸڭٸزدٸ باتىر سانايسىز با?
جوق, مەن ٶزٸمدٸ باتىر سانامايمىن. بۇل مەنٸڭ ادامدىق مٸندەتٸم. سول مٸندەتٸمدٸ اتقاردىم.
- امان بول, ابىلاي! ٶمٸردە بارلىق ارمان-ماقساتتارىڭ ٸسكە اسىپ, ورىندالسىن. باتىر دەگەن اتقا لايىقسىڭ.
سۇحباتتاسقان اسحات قاسەنعالي
