Tokio Paralimpiadasynyń kúmis júdegeri Temirjan Dáýlet elordadaǵy marapat keshinde altyn júlde alýǵa ne kedergi bolǵanyn aityp berdi, dep habarlaidy QazAqparat.
«Qurmetti sportsúier qaýym, keshe ǵana Tokio Paralimpiadasy aiaqtaldy. Paralimpiada sportshylary atynan sizderge shyn júrekten rizashylyǵymdy bildiremin. Bizdiń bul júldelerimiz – memleket tarapynan jáne qazaq halqynyń sportshylarǵa kórsetip kele jatqan qoldaýynyń kórinisi. Qazaqstan Táýelsizdiginiń 30 jyldyǵyna orai kók bairaǵymyzdy sport arenasynyń biiginde jelbiretip, Tokio tórinde ánuranymyzdy shyrqattyq. Alda áli talai jeńisti sátterimiz bolady», - dedi ol.
Sonymen birge, sportshy jarys kezinde nelikten altyn medal ala almaǵanyn túsindirdi.
«Alǵashqy kúni ýaqyt jaǵy jáne ystyq aýa raiy azdap qiyndyq týǵyzdy. Sebebi bizdiń elmen salystyrǵanda 5-6 gradýsqa ystyq boldy. Jalpy daiyndyǵymyz jaqsy ótti. Psihologiialyq turǵyda da daiyn boldyq. Tokioda óz jerimizde júrgendei sezindik. Altynǵa jete almaǵanyma ózim kinálimin. Asyǵyp, qatelik jiberip qoidym. Qarsylasty sharshatyp, ýaqyt sozýym kerek edi. Sonda jeńis meniki bolatyn edi», - dedi Temirjan Dáýlet.
Sportshy memleket tarapynan alǵan qarajatyn óz qajetine jumsaitynyn aitty.
«Ózimniń jumystarym, qaryzdarym bar. Qarajatty ózime jaratamyn», - dedi sportshy.
Aita keteiik, Paralimpiada oiyndarynda Qazaqstan 5 medal aldy. Onyń bireýi - altyn, úsheýi - kúmis, bireýi - qola medal.
Jalpy komandalyq esepte qazaqstandyq sportshylar 51-orynǵa taban tiredi.
Búgin Prezident Qasym-Jomart Toqaevtyń Jarlyǵymen David Degtiarev III dárejeli «Barys» ordenimen, Zarina Baibatina, Temirjan Dáýlet, Ánýar Sarievter «Parasat» ordenimen, Nurdáýlet Jumaǵali «Qurmet» ordenimen marapattaldy.
Qyrymbek Kósherbaev is-shara barysynda altyn medal alǵan David Degtiarevke 106 million teńge, kúmis medalge ie bolǵan Zarina Baibatina, Temirjan Dáýlet, Ánýar Sarievterge 63 million teńge, qola júldeger atanǵan Nurdáýlet Jumaǵalige 31 million teńge qarjylai syiaqy tabystady.
