© AFP 2023 / VINCENZO PINTO
Qazaqstandyq aýyr atlet, Tokiodaǵy jazǵy Olimpiada oiyndarynyń qola júldegeri Igor Son doping daýyna bailanysty sporttan 8 jylǵa shettetildi. Bul týraly Ulttyq antidoping ortalyǵynyń resmi saity habarlady, - dep jazady Massaget.kz portaly.
Son 8 jyl boiy sporttyq jarystarǵa qatysa almaidy. Naqtyraq aitsaq, 2030 jyldyń naýryz aiyna deiin qatysýǵa ruqsaty joq. Al shettetilý ýaqyty 2022 jyldyń naýryz aiynan bastalǵan. Sportshynyń doping synamasynan metasteron anyqtalǵan.
Qazaqstandyq sportshy 2020 jyly Tokioda 61 kiloǵa deiingi salmaqta qola medal enshilegen edi. Al 2019 jyly álem chempionatynda kúmis alǵan.
Aita keteiik, Igor mansabynda ekinshi ret doping daýyna iligip otyr. Buǵan deiin qazaqstandyq aýyr atlet 2015 jyly jasóspirimder arasyndaǵy álem chempionatynan keiin birneshe aiǵa jarystardan shettetilgen. Ol kezde sportshy tyiym salynǵan preparat aǵzasyna bioqosymshalar arqyly túskenin dáleldep shyqqan edi.
Halyqaralyq Olimpiada komitetiniń (HOK) erejesine sáikes, doping qoldanǵany úshin jarystardan shettetilgen sportshynyń Olimpiadadaǵy nátijesi de joiylady. Igordy da sondai jaǵdai kútip tur.
Qazaqstannyń Ulttyq antidoping ortalyǵy Igor Sondy ǵana emes, birqatar sportshylardy jarystardan shettetti. Olardyń qatarynda aýyr atletterden ózge taekvondo men jeńil atletika sportshylary da bar.
