Tokiodaǵy jazǵa belgilengen Olimpiada oiyndary koronavirýs indetine bailanysty shetel jankúierlerinsiz ótedi. Indet saldarynan jarystyń ózi bir jylǵa shegerilgen edi. Tórt jyl saiyn keletin sport oiyndary 2020 jyly shilde-tamyz ailaryda ótýi kerek bolǵan. Olimpiada jáne Paraolimpiada oiyndaryna bilet alyp úlgergen halyqaralyq jankúierlerge bilet quny qaitarylady. Mundai jankúierlerdiń sany – 900 myń. Qonaqúige bron qoiý sekildi qosalqy shyǵyndar ótelmeidi.
Sondai-aq sheteldik eriktiler qyzmetinen bas tartý jáne qatysýshy elder delegatsiiasynyń sanyn qysqartý jóninde sheshim qabyldandy. Uiymdastyrýshylar bul sharaǵa amalsyzdan baryp otyrǵanyn, atletter men Japoniia halqynyń densaýlyǵyna basymdyq beretinin aitady. Osyǵan deiin Japoniia úkimeti sheteldik kórermenderdiń bolýyna qarsy ekenin bildirgen. Qazir epidemiiaǵa bailanysty elge kirý talaptary kúsheitilgen.
Indet bastalǵaly Japoniiada koronavirýs 450 myń adamnan anyqtalǵan. Onyń 8 myńnan astamy qaitys bolǵan. Koronavirýspen tirkelgen naýqastar sany jan basyna shaqqanda Batys elderiniń kóbine qaraǵanda tómen. Elde shekteý sharalary qabyldanǵan, biraq qatań karantin týraly sóz bolyp otyrǵan joq.
