Belgili jazýshy, synshy, ádebiet pen óner zertteýshisi, belgili abaitanýshy Tóken Ibragimov 79 jasqa qaraǵan shaǵynda dúnieden ozdy. Qazaq rýhaniiaty qara jamyldy. Qaraly qabarǵa qabyrǵasy qaiysqan aqyndar ókinishin óleńge tókti. Tynyshtyqbek Ábdikákimuly men Merei Qarttyń óleńin oqyrman nazaryna usynamyz.
Tóleýjar Ibrahim rýhyna
Ýai, Qara Shal,
Birese, ashyp tastap óleń ańqyǵan Túnge esik,
Birese, kóńilimizden Kún kóship,
Birese – pendelerge mingesip,
Perishtelermen úndesip, birese,
Tirlik etip keldik, sońyńnan qubyla ilese.
Turmyz endi altyn súiegińdi kúzetip.
Mundaida,
Barsha qyzyqtan
Bir tamshy kóz jasy aýyr, myń ese!
Ómir degeniń – kóleńkesindei ǵana jumaqtyń.
Uzaǵanda, – bir-aq kún.
Sol, bir-aq kúnniń myńjyldyq taýqymetine
Sen sekildi óte alady shydap kim!
Alys ta bolsa Alashyńa tilegen murat tym,
Abaidyń jupar jyrymen Dala balbaldaryn da jylattyń!..
Mine,
Qara Kúz bizge qapaly qar-kózimen de qaraidy.
Muńaiǵan muz-kózimen de qaraidy.
Áli talai da talai ókinermiz, jaraidy.
Sen, sirá, Qudaimen kelisip,
Izdep kettiń-aý Ibrahim-Abaidy!..
Jamandyqta bolmas ymyra.
Ýaqyt – ǵaiyp zymyran.
Úirensek edik,
Ózińdei
Kóneniń dana...lyǵynan!..
Arttaǵyǵa senen de sóz qaldy,
Aýzyńnan kórkem burqyrap aqylyńdaǵy shuǵylań!
Iá, Qara Shal,
Jaqsynyń kókiregindegi qiial – bai,
Basynan jasyl ný qaýlatqan bulandai!..
Janyńdy nurǵa bólemep edik tirińde.
Tánińdi gúlge bólep qoidyq, uialmai...
Endi,
Jarqyn beineń ǵana – jubanysh,
Jadymyzǵa jazyp qaldyrǵan duǵańdai.
Qosh bol, Qara Shal!
25. 11. 2017.
Tynyshtyqbek Ábdikákimuly
Qosh bol, Qara shal!
(Tóken Ibrahim rýxyna)
Qara jerge qimasym, Qara Shalym,
Ajaldyń tyrnaǵynan arasha kim!
Óńmenimnen ótti ǵoi, qaiǵy jeli,
Qandai sýyq xabary qarashanyń!..
Kúńirentip kettiń-aý mań dalany,
Ańyzdaiyn Abyzym, asyl súiek!
Janym birge ushardai qomdanady,
Tánim tur tabytyńa basyn súiep.
Shaq edi aqylyńnyń nárin urttar,
Sharasyz júregimiz kóndigedi.
Kúrsindi túnimenen kári bulttar,
Qarasha – Qara Shaldyń sońǵy demi.
Abai! Abai!-dep kettiń kelmesińe.
Tabysarsyz Alashshyl arystarǵa.
Erip kele jatyrmyz el kóshine,
Tánińizdi máńgige tabystaýǵa.
Taýlarym-ai, taǵy da alasardyń,
Shek bar ma jaratqannyń ámirine!
Qara da tur , kóktemde Qara Shaldyń,
Óleń kóktep turady qabirinde!
Merei Qart
