Ishki ister ministrligi «Zań men Tártip» qaǵidaty aiasynda el aýmaǵynda sintetikalyq esirtki taratý arnalaryna qarsy kúresti kúsheitti. Mamyr aiynyń ekinshi onkúndiginde esirtki qylmysyna qarsy is-qimyl bólinisteri birneshe iri arnanyń jolyn kesti, dep habarlaidy ult.kz.
Polisia.kz jazýynsha, Almatyda júrgizilgen jedel is-sharalar barysynda qala turǵyny ustalyp, odan eki keliden astam alfa-PVP sintetikalyq esirtkisi tárkilendi. Kúdikti óz kinásin moiyndaǵan. Sonymen qatar megapoliste taǵy bir azamat qolǵa tústi. Onyń úiin tintý kezinde shamamen bir keli sintetikalyq esirtki men psihotroptyq áseri bar dárilik zattar tabylǵan.
Shyǵys Qazaqstan oblysynda internet-dúken kýratorynyń tapsyrmasymen óńirlerge esirtki tasymaldap júrgen Almaty oblysynyń turǵyny ustaldy. Odan eki keliden astam esirtki tárkilendi.
Al Qaraǵandy oblysynda Almaty — Ekaterinbýrg tasjolynda sintetikalyq esirtki tasymaldaǵan kúdikti qolǵa tústi. Kólikti tekserý kezinde bir keli alfa-PVP tabylǵan.
IIM esirtki qylmysyna qarsy is-qimyl komiteti basqarmasynyń bastyǵy Baqytjan Ámirhanov tárkilengen zattardyń jalpy salmaǵy alty keliden asqanyn málimdedi. Onyń aitýynsha, bul zańsyz ainalymǵa túsýi múmkin 18 myńnan astam bir rettik dozanyń jolyn kesken.
— Myńdaǵan jastyń ómiri men densaýlyǵyna qaýip tóndirgen arnalardyń joly toqtatyldy. Jastardy «jeńil aqsha» týraly jalǵan usynystarǵa aldanbaýǵa shaqyramyz. Qylmystyq toptar olardy tek «shyǵyn materialy» retinde paidalanady, — dedi ol.
Atalǵan faktiler boiynsha Qylmystyq kodekstiń 297-baby 3-bóligimen sotqa deiingi tergeý júrgizilip jatyr. Barlyq kúdiktiler ýaqytsha ustaý izoliatoryna qamaldy.
Buǵan deiin Semeide garajyn esirtki qoimasyna ainaldyrǵan turǵynnan 154 keli marihýana tárkilengen edi.
