بەلگٸلٸ جازۋشى, سىنشى, ەدەبيەت پەن ٶنەر زەرتتەۋشٸسٸ, بەلگٸلٸ ابايتانۋشى تٶكەن يبراگيموۆ 79 جاسقا قاراعان شاعىندا دٷنيەدەن وزدى. قازاق رۋحانيياتى قارا جامىلدى. قارالى قابارعا قابىرعاسى قايىسقان اقىندار ٶكٸنٸشٸن ٶلەڭگە تٶكتٸ. تىنىشتىقبەك ەبدٸكەكٸمۇلى مەن مەرەي قارتتىڭ ٶلەڭٸن وقىرمان نازارىنا ۇسىنامىز.
تٶلەۋجار يبراھيم رۋحىنا
ۋاي, قارا شال,
بٸرەسە, اشىپ تاستاپ ٶلەڭ اڭقىعان تٷنگە ەسٸك,
بٸرەسە, كٶڭٸلٸمٸزدەن كٷن كٶشٸپ,
بٸرەسە – پەندەلەرگە مٸنگەسٸپ,
پەرٸشتەلەرمەن ٷندەسٸپ, بٸرەسە,
تٸرلٸك ەتٸپ كەلدٸك, سوڭىڭنان قۇبىلا ٸلەسە.
تۇرمىز ەندٸ التىن سٷيەگٸڭدٸ كٷزەتٸپ.
مۇندايدا,
بارشا قىزىقتان
بٸر تامشى كٶز جاسى اۋىر, مىڭ ەسە!
ٶمٸر دەگەنٸڭ – كٶلەڭكەسٸندەي عانا جۇماقتىڭ.
ۇزاعاندا, – بٸر-اق كٷن.
سول, بٸر-اق كٷننٸڭ مىڭجىلدىق تاۋقىمەتٸنە
سەن سەكٸلدٸ ٶتە الادى شىداپ كٸم!
الىس تا بولسا الاشىڭا تٸلەگەن مۇرات تىم,
ابايدىڭ جۇپار جىرىمەن دالا بالبالدارىن دا جىلاتتىڭ!..
مٸنە,
قارا كٷز بٸزگە قاپالى قار-كٶزٸمەن دە قارايدى.
مۇڭايعان مۇز-كٶزٸمەن دە قارايدى.
ەلٸ تالاي دا تالاي ٶكٸنەرمٸز, جارايدى.
سەن, سٸرە, قۇدايمەن كەلٸسٸپ,
ٸزدەپ كەتتٸڭ-اۋ يبراھيم-ابايدى!..
جاماندىقتا بولماس ىمىرا.
ۋاقىت – عايىپ زىمىران.
ٷيرەنسەك ەدٸك,
ٶزٸڭدەي
كٶنەنٸڭ دانا...لىعىنان!..
ارتتاعىعا سەنەن دە سٶز قالدى,
اۋزىڭنان كٶركەم بۇرقىراپ اقىلىڭداعى شۇعىلاڭ!
يە, قارا شال,
جاقسىنىڭ كٶكٸرەگٸندەگٸ قييال – باي,
باسىنان جاسىل نۋ قاۋلاتقان بۇلانداي!..
جانىڭدى نۇرعا بٶلەمەپ ەدٸك تٸرٸڭدە.
تەنٸڭدٸ گٷلگە بٶلەپ قويدىق, ۇيالماي...
ەندٸ,
جارقىن بەينەڭ عانا – جۇبانىش,
جادىمىزعا جازىپ قالدىرعان دۇعاڭداي.
قوش بول, قارا شال!
25. 11. 2017.
تىنىشتىقبەك ەبدٸكەكٸمۇلى
قوش بول, قارا شال!
(تٶكەن يبراhيم رۋxىنا)
قارا جەرگە قيماسىم, قارا شالىم,
اجالدىڭ تىرناعىنان اراشا كٸم!
ٶڭمەنٸمنەن ٶتتٸ عوي, قايعى جەلٸ,
قانداي سۋىق xابارى قاراشانىڭ!..
كٷڭٸرەنتٸپ كەتتٸڭ-اۋ ماڭ دالانى,
اڭىزدايىن ابىزىم, اسىل سٷيەك!
جانىم بٸرگە ۇشارداي قومدانادى,
تەنٸم تۇر تابىتىڭا باسىن سٷيەپ.
شاق ەدٸ اقىلىڭنىڭ نەرٸن ۇرتتار,
شاراسىز جٷرەگٸمٸز كٶندٸگەدٸ.
كٷرسٸندٸ تٷنٸمەنەن كەرٸ بۇلتتار,
قاراشا – قارا شالدىڭ سوڭعى دەمٸ.
اباي! اباي!-دەپ كەتتٸڭ كەلمەسٸڭە.
تابىسارسىز الاششىل ارىستارعا.
ەرٸپ كەلە جاتىرمىز ەل كٶشٸنە,
تەنٸڭٸزدٸ مەڭگٸگە تابىستاۋعا.
تاۋلارىم-اي, تاعى دا الاساردىڭ,
شەك بار ما جاراتقاننىڭ ەمٸرٸنە!
قارا دا تۇر , كٶكتەمدە قارا شالدىڭ,
ٶلەڭ كٶكتەپ تۇرادى قابٸرٸندە!
مەرەي قارت
