Qazaqstan Prezidenti Jambyl oblysyndaǵy oqiǵaǵa bailanysty málimdeme jasady, dep habarlaidy "Ult aqparat" Aqordanyń baspasóz qyzmetine silteme jasap.
"Búgin túnde Jambyl oblysy Qordai aýdanynda jergilikti turǵyndar arasynda jappai tóbeles, janjal boldy. Bul ahýaldy arandatýshylar óz maqsatyna paidalandy. Ókinishke qarai, bul oqiǵa kezinde adam shyǵyny boldy. Men qaza bolǵan azamattardyń otbasylaryna kóńil aitamyn. Zardap shekkenderdiń tezirek saýyǵyp ketýine tilektespin", - delingen habarlamada.
Qazir politsiia men Ulttyq ulan bul jaǵdaidy baqylaýǵa aldy.
"Osyǵan orai, men Úkimet komissiiasyn qurýdy tapsyrdym. Oǵan premer-ministrdiń orynbasary Berdibek Mashbekuly Saparbaev tóraǵalyq etedi. Úkimet komissiiasy bolǵan oqiǵanyń sebebin anyqtaidy. Jambyl oblysy ákimimen birlesip, qaza bolǵandardy jerleý, zardap shekkenderge kómektesý jumystaryn uiymdastyrady. Sondai-aq, jaǵdaidy turaqtandyrýmen ainalysady", - dedi Prezident.
Toqaev qoǵamdyq tártipti buzǵandar anyqtalyp, qatań jaýapqa tartylatynyn aitty.
"Bas prokýratýraǵa, Ulttyq qaýipsizdik komitetine tiisti tapsyrma berdim. Memleketimizdiń múddesine ziian keltiretin, bereke-birligimizdi buzatyn jáne jalǵan aqparat taratqan azamattar zań aldynda jaýap beredi", - delingen habarlamada.
Onyń aitýynsha, beibitshilik pen qoǵamdyq kelisim – memleketimizdiń berik negizi.
"Halqymyz qiyn-qystaý zamandarda óziniń birtutastyǵyn saqtap qalǵan. Sondyqtan, biz keibir azamattarǵa, sonyń ishinde arandatýshylarǵa elimizdiń basty qundylyǵyn – yntymaq-birligimizdi buzýǵa jol bermeimiz. Bul elimizdegi barsha azamattarǵa ortaq tilek dep sanaimyn", - dedi Memleket basshysy.
Ol azamattardy jalǵan qaýesetterge boi aldyrmaýǵa, qoǵamdyq qaýipsizdikti qamtamasyz etý jumysynda quqyq qorǵaý organdaryna kómek berýge shaqyrdy. Sondai-aq, memlekettik organdar týyndaǵan máselelerdi sheshý úshin barlyq qajetti sharalardy qabyldaitynyn aitty.
