Búgin Almaty qalasynda qurylǵan «Toqaevtyń reformalary úshin» jalpyrespýblikalyq qozǵalysy nemen ainalysatynyn aqyn, Qazaqstan Jazýshylar odaǵy tóraǵasynyń birinshi orynbasary Aqberen Elgezek baiandap berdi, dep habarlaidy BAQ.KZ tilshisi.
Qoǵamdyq qozǵalysty qurý jónindegi bastamany belgili qoǵam jáne saiasi qairatkerler, ǵylymi jáne shyǵarmashylyq ziialy qaýym men biznes-qoǵamdastyq ókilderi, mádeniet jáne sport qairatkerleri, sondai-aq qoǵamdyq uiymdardyń kóshbasshylary kóterdi. Solardyń biri – aqyn, Qazaqstan Jazýshylar odaǵy tóraǵasynyń birinshi orynbasary Aqberen Elgezek.
Birlestik qurýdyń basty ideiasy - Memleket basshysynyń reformalaryn qoǵamdyq qoldaý men olardy iske asyrýǵa qajetti jaǵdai jasaý.
"El taǵdyry men bolashaǵy báigege túsken shaqta el tileýin tilegen niettester bárimiz bir uiymǵa jinalyp otyrmyz. Búginnen bastap Prezident Qasym-Jomart Toqaevtyń reformalaryn qoldaý uiymy quryldy. Bul uiym qoǵamdyq qozǵalys, eshqandai zańdyq tulǵa retinde tirkelmeidi. Turaqtylyqty, jarqyn bolashaqty qoldaityn basqa da azamattar jaqyn arada qatarymyzǵa qosylady degen oidamyz", – dedi Aqberen Elgezek.
Qozǵalys quramynda Mereke Qulkenov, Raiymbek Batalov, Aqberen Elgezek, Sergei Ponomarev, Beknur Qisyqov, Dáýren Qýat, Dáýletkerei Kápuly, Ádil Ahmetov, Nazgúl Qarabalina, Marat Shibutov sekildi biznes, mádeniet jáne óner, sport jáne basqa da ártúrli saladan jinalǵan azamattar bar.
"Kóbisin el tanidy. Árqaisynyń óz berik pozitsiiasy, tanym-túsinigi, ómirlik tájiribesi, aitar pikiri bar. Sol sebepten eshkim eshkimdi kúshtemedi. Óziniń sheshimi negizinde osy qozǵalysqa jinalyp otyr. Joldaýda sailaý týraly aitylǵaly qoǵamda ártúrli pikir júrip jatyr. Demokratiialyq jáne oppozitsiialyq kúshterdiń birigýi óte durys nárse dep esepteimin. Olardyń tańdaýyn biz qurmetteimiz, óitkeni ashyq, teń saiasi doda bolýy kerek", – dedi qozǵalystyń múshesi.
Ol sharaǵa qatysýshylardyń eń aldymen Prezidenttiń bastap jatqan, júrgizip jatqan jáne júrgizýge tiis reformalaryn qoldap otyrǵanyn aityp, qoǵamnyń barlyq aqyldy adamdaryn da qoldaýǵa shaqyrdy.
"Biz turaqtylyqty qoldaýymyz kerek. Beibit ómirdiń jeńisteri óte kóp bolady. Shynymen de tarazynyń eki basynda emotsiia men aqyl tur, sondyqtan biz aqyldy tańdadyq. Bizde ǵana emes álemdik ekonomikada jaǵdai óte kúrdeli. Álemde, bizdiń mańaiymyzda geosaiasi ahýal óte qiyn. Táýelsizdiktiń ótken otyz jylynda jasalmaǵan saiasi reformalardy atqarý siiaqty aýqymdy jumystar kútip tur. Ony túsinip, qoǵammen kelise otyryp ádiletti, ashyq ári taza jasaǵysy kelip otyrǵan bir adam bar. Ol – bizdiń prezidentimiz Toqaev", – dedi Aqberen Elgezek.
Qozǵalys reformalardy nasihattaý, halyqty qoldaýǵa úgitteý jáne prezidenttiń janyna toptastyrýdy kózdeidi. Soǵan orai ártúrli sharalar ótedi. Belsendi azamattar áleýmettik jelilerde aqparat taratyp, suhbat beredi. Aqberen Elgezek ózgeristerdi qalaityn, saiasi reformalardy qoldaityn ár azamat qozǵalysqa múshe bola alatynyn atap ótti.
"Kózi ashyq azamattar pikirlesý arqyly osynda jinaldyq. Turaqtylyqty, damýdy, eń bastysy úlken saiasi ózgeristerdi qalaimyz. Bolashaqta kóptegen shara ótkizgimiz keledi. Aqparat zamanynda barlyq telekommýnikatsiia quraldaryn paidala otyryp halyqty prezidenttiń janyna toptasýǵa, reformalaryn qoldaýǵa shaqyramyz. Qozǵalys sailaýdan keiin de jumys isteidi. Qasym-Jomart Toqaev sailaýda kandidatýrasyn usynady jáne jeńip shyǵady degen úmitimiz bar. Jeńip shyqqan jaǵdaida reformalaryn ár qarai qoldap, halyq ishinde nasihattaimyz", – dedi qozǵalystyń múshesi.
