Memleket basshysy Qasym-Jomart Toqaevtyń biylǵy Joldaýy elimizde, álemde mańyzdy oqiǵalar órbip, bolashaqqa qatysty belgisizdikter basym bola túsken tusta jariialandy. Sondyqtan bolar, osy Joldaýǵa jurt erekshe nazar aýdarǵan siiaqty. Al Joldaýdyń burynǵylardan ózgeshe bolǵandyǵy áleýmettik jelidegi jazbalardan da baiqalady. Osy rette belgili ǵalym, professor, Eýraziia ulttyq ýniversitetiniń prorektory Dihan Qamzabekulynyń paraqshasyndaǵy pikirine nazar aýdartqandy jón sanadyq, dep jazady QazAqparat.
«Búgin kúndelikti jumys barysynda 30-40 adammen ushyrasqan shyǵarmyn. Ishinde áriptes te, óńirden kelgen ziialy da, shákirt-jastar da bar. Báriniń júzinen, nietinen senim men jigerdi baiqadym. Kezdeskender: «Toqaevtyń sózin tyńdadyq. Prezident jaqsy aitty. Jurt riza!» - deidi. Pikirdiń bári osyǵan uqsas. «Endi ne bolady?» dep, saryýaiymǵa salynyp júretin egdeleý kórshimniń ózi bylai bir qaiyrdy: «Toqaevty túsindim. Oǵan senýge bolady!». Munyń bári - beiresmi, adami sózder men pikirler. Biraq seń Qazaq elińniń baiandylyǵyna qarai qozǵalǵanyn kórsetetin ómirlik derekter...
Memleket basshysy Joldaýynda qańtar qasiretiniń sebep-saldarynan bólek eldiń búgingi hám aldaǵy saiasi jáne áleýmettik taǵdyry sóz etildi. Aitylǵan 10 baǵdardaǵy usynys ta ómirdiń qainaýynan, tirshiliktiń ózeginen alynǵan. Saiasi júie, sonyń ishinde Prezident ókilettiligi, Parlament tegeýrini, Úkimet kásibiligi, Sailaý júiesindegi ózgerister, Sot pen quqyq isterindegi joǵary talap, BAQ pen azamattyq qoǵam jańǵyrýy, Partiia qurylysy, Óńirler serpilisi t.b. qadaý-qadaý ózekti máselerdiń sheshý tetigi kórsetildi. Iá, qordalanǵan zárýlikti, túiindi tarqatýdyń joly da, jóni de bar. Birinshiden, ony zertteý kerek. Ekinshiden, ony sheshýdiń ońtaily tásilin usyna bilý kerek. Qasym-Jomart Kemeluly bul máselede kásibi mamandarǵa iek artatyny baiqalady. Halyq aitatyn «basshydaǵy qyryq adamnyń aqyly» - osy. Adamyn tap, maman miyna salmaq sal, sonan soń pátýasyn ait!
Prezident Joldaýdyń kirispesinde de, qorytyndysynda da halyq, el, Táýelsizdik múddesiniń ózinen, quzyretinen biik turatynyn málimdedi. Bul - jaýapkershiliktiń sózi. Bálkim El basshysy antynyń jańǵyryǵy.
Qarapaiym adami qasiet biik memleketshil qasietti quraidy. El basshysynyń «Prezidentke týys adamdar joǵary laýazymdy bilikte bolmaýy kerek» nemese «Prezident jáne laýazymdy tulǵalar bilikke jetkende bir ǵana partiianyń múshesi bola almaidy» degenge saiatyn usynystaryn halyq alaqailap qabyldaǵany anyq. Sondai-aq Parlamenttegi Qazaqstan halyqtary Assambleiasynyń ornyn shaqtaý men depýtattyqqa úmitkerlerdiń bir bóligi majoritarlyq jolmen kelýge qatysty usynysy da óte ózekti estildi. Básekeniń aty - báseke. Sailaý máresiniń de soqpaǵy taqtaidai tegis bolmaidy. Sonymen birge halqymyzdy jurtta qalǵandai kúidegi Semei, Jezqazǵan t.b. keshe oblys bolǵan ólkelerdiń taǵdyry men Almaty óńiri turǵyndarynyń asa tyǵyzdyǵy tolǵandyratyn. Q.K.Toqaev osy túiindi de sheshti. El kartasynda Abai, Ulytaý, Jetisý oblystary men D.Qonaev qalasynyń tańbalanatyn kúni de alys emes. «Óshken jandy» degen osy bolsa kerek.
Prezident Joldaýy eki úlken baǵdardaǵy is-sharalar keshenin aiqyndady: 1) Eldi jańartýdaǵy ońtaily saiasi-qurylymdyq ózgerister. 2) Halyqty ortaq maqsatqa jumyldyrýdaǵy memleketshil ideologiialyq jumystar.
Qarapaiym tilmen aitsaq, «bardy uqsatý, kemdi tolyqtyrý» bolyp shyǵady. Eń bastysy, ásire uransyz, keýde soqpai, maqtanshaqtyqqa urynbai áleýmettiń júgin arqalaýdyń abyroily, saýapty joly. Bul senim men jigerdi bekemdeidi. Jolymyz baiandy, tilegimiz baiypty bolsyn!»
