QR Prezidenti Qasym-Jomart Toqaevqa Sybailas jemqorlyqqa qarsy qyzmettiń biylǵy atqarǵan jumysynyń nátijeleri jáne rezonans týdyrǵan qylmystyq isterdiń tekserilý barysy týraly esep berildi, dep habarlaidy Aqorda.
Usynylǵan derekterge sáikes 2 aidyń ishinde 240 adamnyń, onyń ishinde respýblikalyq jáne oblystyq deńgeidegi 40 basshynyń sybailas jemqorlyqqa qatysy bar ekeni áshkerelendi. Olardyń qatarynda 1 vitse-ministr, 1 qala ákimi jáne oblystyq basqarmalardyń 11 jetekshisi bar. Keltirilgen shyǵynnyń ornyn toltyrý úshin kúdiktilerdiń quny 5,4 milliard teńge bolatyn múlkine tyiym salyndy.
Prezidentke Sybailas jemqorlyqqa qarsy qyzmettiń «tazalyǵyn» qamtamasyz etý jónindegi tapsyrmalarynyń oryndalýy jóninde baiandaldy. Sonymen qatar Qasym-Jomart Toqaevqa Sybailas jemqorlyqqa qarsy saiasat tujyrymdamasynyń iske asyrylýy týraly málimet berildi. Salalyq vedomstvo jetekshesiniń aitýynsha, aqpan aiynda Parlament Májilisi negizsiz baiyǵany úshin jaýapkershilik týraly zań jobasyn birinshi oqylymda maquldady. Kvazimemlekettik sektordaǵy komplaens qyzmetteriniń jumysyna, sybailas jemqorlyq úshin basshylardyń derbes jaýapkershiligi institýtyn jetildirýge erekshe kóńil bólindi.
Budan bólek qazirgi ýaqytta «follow the money» qaǵidaty boiynsha qarjylyq tergeýdi damytýǵa, para berý jóninde ýádelesýge jáne para usynýǵa qatysty qylmystyq jaýapkershilikti engizýge jáne sybailas jemqorlyq úshin zańdy tulǵalardyń jaýapkershiligin kúsheitýge baǵyttalǵan zańnamalyq sharalar toptamasy pysyqtalyp jatyr.
Kezdesý qorytyndysy boiynsha Qasym-Jomart Toqaev Oljas Bektenovke Sybailas jemqorlyqqa qarsy saiasat tujyrymdamasyn tiimdi júzege asyrýǵa jáne sybailas jemqorlyq úshin jaýapkershiliktiń bultartpastyǵyn qamtamasyz etýge baǵyttalǵan birqatar tapsyrma berdi.
