Memleket basshysy Qasym-Jomart Toqaev jurtshylyqpen kezdesýinde Jetisý óńirinde qazaqtyń uly aqyny Abai Qunanbaevtyń eskertkishi joq ekenin jáne bul olqylyqty túzetý kerek ekenin aitty, - dep habarlaidy "Ult aqparat" Prezidenttiń baspasóz qyzmetine silteme jasap.
«Men taǵy bir máselege arnaiy toqtalǵym kelip otyr. Búginde uly Abaidyń kesenesi – elimizdegi eń tanymal nysannyń biri. Alaida, Jetisý oblysynda Abaiǵa arnalǵan birde-bir laiyqty eskertkish joq. Bul – uiat nárse, úlken olqylyq. Ony túzetý kerek.
Altynemelde qazaqtyń áigili ǵalymy Shoqan Ýálihanovtyń máńgilik mekeni bar ekeni barsha jurtqa belgili. Shańqanai aýylynda onyń eskertkishi, murajaiy bar. Jergilikti jurt qazaqtyń uly perzenti jerlengen jerdi qaraýsyz qaldyrmaǵan. Biraq, bul jetkiliksiz. Biz Shoqandy álemdik deńgeide dáripteýimiz kerek. Jalpy, biz uly perzentterimizdi qurmettei bilýimiz kerek. Mundai tarihi oryndar týraly únemi aityp, urpaqqa tanystyryp otyrý qajet.
Osy taqyryptan týyndaityn taǵy bir másele bar. El tarihynda erekshe oryn alatyn kóptegen tulǵalarymyz shetelde jerlengen. Ultymyzdyń uly perzentteri Ál-Farabi jáne Beibarys sultan Siriianyń Sham shaharynda jatyr. Qazaqtyń áigili úsh biiniń ekeýi – Tóle bi men Áiteke bidiń ziraty – Ózbekstanda. Qurmanǵazy men Bókei hannyń kesenesi Resei jerinde. Jat jerden topyraq buiyrǵan basqa da kóptegen tarihi tulǵalarymyz bar.
Árine, olardyń báriniń súiegin elge alyp kelý múmkin emes. Ondai maqsat ta joq. Biraq taǵdyrdyń jazýymen jat jerde qalǵan uly babalardy umyt qaldyrmaý – bizdiń azamattyq paryzymyz» - dedi Prezident.
