Foto: Akorda.kz
Memleket basshysy Astana qalasyndaǵy №96 mektep-gimnaziiany aralap kórdi, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke bilim oshaǵyndaǵy oqý-tárbie jumystarynyń barysy tanystyryldy. Bul mektep jemqorlardan tárkilengen qarjyǵa salyndy. Biyl paidalanýǵa berilgen gimnaziia elordanyń sol jaǵalaýyndaǵy basqa mektepterdiń júktemesin azaitýǵa septigin tigizdi. Qazir munda 1466 oqýshy bilim alady.
Qasym-Jomart Toqaevqa qoǵamdyq-gýmanitarlyq baǵytta bilim beretin mektep-gimnaziianyń oqý úderisi týraly baiandaldy. Oqýshylarǵa aǵylshyn, frantsýz tilderimen qatar, qytai tili de oqytylady.
Mektep direktory Sáýle Temenovanyń aitýynsha, munda inkliýzivti bilim berýge basa nazar aýdarylǵan. Bul rette ár oqýshyǵa jeke oqý baǵdarlamasy ázirlengen. Sondai-aq inkliýzivti qoldaý, emdik dene shynyqtyrý jáne beiinaldy daiarlaý kabinetteri bar.
Búginde mektep-gimnaziiada arnaýly bilim berýdi qajet etetin 28 bala oqidy. Sonymen qatar mektepte tsirk, qysh óneri, balet úiirmeleri jumys isteidi.
Memleket basshysy mektep-gimnaziianyń sport zalyn, robotty tehnika kabinetin aralap kórip, oqýshylarmen áńgimelesti.
– Robotty tehnika – perspektivti sala. Men sizderdi qoldaimyn. Qazir álem jasandy intellektige basa mán berip otyr. Onyń ishinde Qazaqstan da bar. Bul – óte mańyzdy baǵyt. Jasandy intellekt keleshekte árbir salada paidalanylady. Sondyqtan Qazaqstan osy iste ozyq el bolýy kerek dep oilaimyn, – dedi Qasym-Jomart Toqaev.
Sonymen qatar Prezident №96 mektep-gimnaziianyń pedagogikalyq ujymymen júzdesip, memleket ustazdardyń mártebesin odan ári kóterýdi jalǵastyra beretinin aitty.
Budan bólek, Memleket basshysyna elordanyń bilim berý júiesi jaiynda baiandaldy. Astana qalalyq Bilim basqarmasynyń basshysy Qasymhan Senǵazyev biyl 16 myń oqýshyǵa arnalǵan 12 mektepti paidalanýǵa berý josparlanyp otyrǵanyn jetkizdi. Búginge deiin 7 mektep ashylǵan. Jyl sońyna deiin taǵy 5 jańa mektep iske qosylmaq.
Sonymen qatar basqarma basshysy Prezidenttiń Astana qalasynda pedagogikalyq joǵary oqý ornyn ashý jónindegi tapsyrmasy boiynsha atqarylyp jatqan jumystarǵa toqtaldy.
