Memleket basshysy óz sózinde Táýelsizdik kúni qarsańynda jastarmen kezdesýiniń mańyzdy ekenin atap ótti, dep habarlaidy "Ult aqparat" Aqordaǵa silteme jasap.
– Biz úshin budan asqan qasterli ári mańyzdy mereke joq. Táýelsizdigimizdi nyǵaityp, elimizdi odan ári órkendetý – qazirgi urpaqtyń qasietti boryshy. Sondyqtan biz sizderge zor úmit artamyz. Memleketimizdiń keleshegi – ózderińiz! Búgingi jastar – elimizdiń erteńi, ultymyzdyń bolashaǵy, memleketimizdiń mártebesi. Urpaǵyn aialai bilgen halyq irgeli jurtqa ainalatyny belgili. Biz halqymyzdy álemge tanytqan eń asyl qasietterdi sizderdiń boilaryńyzdan kórgimiz keledi, – dedi Qasym-Jomart Toqaev.
Prezidenttiń aitýynsha, Elbasy Nursultan Nazarbaevtyń bastamasymen ótken Jastar jylynda memlekettik organdar óskeleń urpaqty qoldaý maqsatynda kóptegen jumys atqarǵan, birneshe baǵyttar boiynsha jobalar iske asqan, onyń ishinde, baspanamen jáne jumyspen qamtý, sapaly ári qoljetimdi bilim berý isi qolǵa alynǵan.
– Elimizdiń iri qalalarynda jumysshy jastarǵa 9 myń páter berý týraly sheshim qabyldandy. Ony jalǵa alý quny aiyna 15 myń teńge ǵana bolady. Biyl 5 myń azamat memleketten grant alyp, jas kásipker atandy. Aldaǵy úsh jyl ishinde olardyń sany 30 myńǵa deiin kóbeiedi. Budan bólek 10 myń jas biznesmen shaǵyn nesieniń arqasynda óz óndirisin keńeitti. Sonyń basym kópshiligi aýdan jáne aýyl turǵyndaryna arnaldy, – dedi Memleket basshysy.
Qasym-Jomart Toqaev jastardyń nazaryn olar úshin ashylyp jatqan jańa perspektivalarǵa, jas býynnyń álemdegi aldyńǵy qatarly ýniversitetterde bilim alý múmkindikterine aýdardy. Sondai-aq jastardy jetekshi tehnologiialyq kompaniialarda jumys isteýge, óz jobalaryn ozyq ǵylymi ortalyqtarda júzege asyrýǵa shaqyrdy.
– Kez kelgen eldiń tabysy óz azamattarynyń jekelegen jetistikterinen quralady. Eger árqaisysyńyz aldaryńyzǵa qoiǵan maqsatqa qol jetkizip, óz qabiletterińizdi arttyrsańyzdar, memleket te tabysty bolady. Búgingidei joǵary básekege qabiletti álemde eshkim týǵannan tabysty bola almaidy jáne oǵan kepildik te berilmeidi. Ol úshin únemi eńbektený kerek, eń aldymen, óz-ózińdi damytýyń qajet, – dedi Memleket basshysy.
Prezident jastardy qoldaý jóninde biryńǵai keshendi baǵdarlama jasaý qajettigin aitty.
– Biryńǵai baǵdarlama óskeleń urpaqtyń ózekti problemalaryn sheshýge baǵyttalady. Eń bastysy, onyń mehanizmi jastarymyz úshin qarapaiym ári túsinikti bolýy tiis. Jeke jáne kásibi turǵydan ósý, jumysqa ornalasý nemese turǵyn úi alý úshin Qazaqstannyń qai jerinde, qandai múmkindikter bar ekenin árkim bilýge tiis, – dedi Qasym-Jomart Toqaev.
Qazaqstan Prezidenti bilim berý sapasy men qol jetimdiligin arttyrý isin negizgi mindetterdiń biri retinde kórsetti. Memleket basshysy diplom basyp shyǵaratyn jáne taratatyn mekemege ainalǵan joǵary oqý oryndaryna qatysty shara qabyldaý qajettigin talap etti. Sonymen qatar Prezident Úkimetke joǵary oqý oryndary men kolledj stýdentteriniń stipendiiasyn kóterýdi tapsyrdy.
– Joǵary oqý oryndary stýdentteriniń stipendiiasyn arttyrý ózekti máselelerdiń biri ekenin bilemin. Bul máselege kóńil bólinbei qaldy. 2016 jyldan beri stipendiia kóbeigen joq. Sondyqtan stýdentterdi qoldaý úshin 2020 jyldyń 1 qańtarynan bastap bakalavriat, magistratýra men doktorantýrada oqityn stýdentterdiń stipendiiasyn 25 paiyzǵa ósirý jóninde sheshim qabyldadym. Bul jalpy 130 myńǵa jýyq adamdy qamtidy. Mundai qoldaý kolledj stýdentterine de kórsetiletin bolady, – dedi Memleket basshysy.
Qasym-Jomart Toqaev aldaǵy Volonter jylynyń mindetteri týraly aita kelip, birneshe negizgi baǵyttarǵa nazar aýdarýdy usyndy.
«Sabaqtastyq» jobasy aiasynda eriktiler balalar úiiniń tárbielenýshilerin óz qamqorlyqtaryna ala alady. «Saýlyq» baǵyty boiynsha meditsinalyq volonterlik damidy, olar aýyrǵan adamdarǵa járdem kórsetedi. «Taza álem» jobasy qorshaǵan ortany qorǵaýǵa baǵyttalǵan. «Asyl Mura» baǵyty eriktilerdi materialdyq jáne rýhani, mádeni-tarihi muralardy saqtaý jumystaryna tartady. «Qamqor» bastamasy qarttar úiindegi eriktiler jumysyn qamtamasyz etedi. «Bilim» jobasy aýyl mektepterindegi joǵary synyp oqýshylaryn UBT-ǵa daiyndaý jumystaryna, aǵylshyn tilin úiretip, kompiýterlik saýattylyqty jetildirýge kómektesedi. «Úmit» jobasy boiynsha eriktiler Ekinshi dúniejúzilik soǵystaǵy Jeńistiń 75 jyldyǵy aiasynda otandastarymyzdyń erligin baiandaityn qujattardy izdestirýmen ainalysady.
Prezident volonterlikti ulttyq masshtabta ǵana emes, árbir qala men aýylda damytý kerek dep sanaidy. Sonymen qatar ujymdyq volonterlikti órkendetýge memlekettik apparatty da, ulttyq jáne iri kompaniialardy da atsalysýǵa shaqyrdy.
– Dana halqymyz «Jumyla kótergen júk jeńil» degen. Qaiyrymdylyq pen meiirimdilik – qanymyzǵa sińgen qasiet. Qazaqta asar jasap, bir-birine kómektesip, qoldaý kórsetý dástúri bar. Onyń volonterlikpen úndesetini sózsiz. Sondyqtan aldaǵy jyly sol dástúrdi zamanǵa sai qaita jańǵyrtýymyz qajet, – dedi Memleket basshysy.
Shara sońynda Qasym-Jomart Toqaev jastardyń belsendi ókilderin memlekettik nagradalarmen jáne alǵys hattarymen marapattady. Sondai-aq EKSPO aýmaǵynda ashylǵan «ArtHUB» shyǵarmashylyq bastamalar ortalyǵynyń jobalarymen tanysty.
Memleket basshysynyń sóilegen sóziniń tolyq mátinimen myna jerden tanysýǵa bolady.
