Memleket basshysy aldaǵy ýaqytta sailaýaldy tuǵyrnamasyn usynatynyn aitty, - dep habarlaidy Tengrinews.kz.
"Jaqyn arada men sailaýaldy tuǵyrnamany usynamyn, onda eldi jan-jaqty transformatsiialaý, azamattardyń ál-aýqatyn arttyrý jónindegi sharalar bolady. Meniń senimim boiynsha, bizdiń memleket óńirlik jáne jahandyq qaýipsizdikti qamtamasyz etýge baǵyttalǵan teńdestirilgen, kóp baǵytty, syndarly syrtqy saiasatty júzege asyrýy tiis", - dedi Toqaev Astanadaǵy forýmda.
Prezident Qazaqstan halyqaralyq qatynastardaǵy teńdik pen demokratiia qaǵidattaryn, halyqaralyq quqyq pen BUU jarǵysyn udaiy saqtaýdy únemi qoldaitynyn aitty.
"Qazaqstan BUU-nyń ámbebap jáne balamasyz halyqaralyq uiym retindegi bedelin nyǵaitý úshin belsendi kúsh-jiger jumsaidy. Biz Táýelsiz memleketter dostastyǵy, Shanhai yntymaqtastyq uiymy, Eýropadaǵy qaýipsizdik jáne yntymaqtastyq uiymy, Túrki memleketteri uiymy jáne basqa da halyqaralyq uiymdarmen yntymaqtasamyz, sondai-aq Aziiadaǵy ózara is-qimyl jáne senim sharalary jónindegi keńestiń áleýetin nyǵaitamyz", - dedi Memleket basshysy.
Qasym-Jomart Toqaev mundai syrtqy saiasat Qazaqstannyń strategiialyq múddesine sai keletinine senimdi.
"Ulttyq tarihtyń osy betburys kezeńinde Qazaqstan halqy maǵan aldaǵy sailaý barysynda senim bildiredi dep senemin. Sailaý - bul qarapaiym is-shara emes, azamattardyń Otan taǵdyryna qatystylyǵyn rastaityn patriotizm men demokratiianyń shynaiy aktisi. Bizdiń kúshimiz birlik pen birigýde, yntymaqtastyqta. Biz ártúrlimiz, biraq biz bolashaqqa umtylǵan birtutas ultpyz", - dedi Prezident.
