Prezident Qasym-Jomart Toqaev memlekettik nagradalar, joǵary áskeri jáne arnaýly ataqtar, synyptyq shender berý rásimine qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy saltanatty rásimge qatysýshylardy Otan qorǵaýshy kúnimen jáne Jeńis meiramymen quttyqtap, elimizdiń qaýipsizdigin qamtamasyz etý isindegi áskeri qyzmetshiler men arnaýly memlekettik organdar qyzmetkerleriniń úlesin erekshe atap ótti.
– Biyl Qazaqstan Qarýly Kúshteriniń qurylǵanyna 30 jyl tolyp otyr. Osy kezeńde áskerimiz aibyndy armiiaǵa ainaldy. Qyraǵy jaýyngerlerimiz el shebin qas qaqpai kúzetip tur. Olar memlekettigimizdi nyǵaitýǵa zor eńbek sińirýde. Qarýly Kúshterimiz – Táýelsizdiktiń myzǵymas tuǵyry, eldiktiń berik qalqany, – dedi Toqaev.
Prezident jaqsy jabdyqtalǵan zamanaýi armiia memlekettiligimizdiń berik qorǵany ekenin aitty.
– Geosaiasi turaqsyzdyq, jańa syn-tegeýrinder men qaýip-qaterler jaǵdaiynda biz ulttyq múddemizdi qorǵaýǵa, memleketimizdiń egemendigi men aýmaqtyq tutastyǵyn saqtaýǵa daiyn bolýymyz kerek. Sondyqtan qorǵanys áleýetin nyǵaitý árdaiym bizdiń mańyzdy basymdyǵymyz bolady, – dedi Memleket basshysy.
Qasym-Jomart Toqaev kúshtik organdarda qyzmet etýdiń abyroily missiia jáne úlken jaýapkershilik ekenin atap ótti. Onyń aitýynsha, Qazaqstan Qarýly Kúshteriniń sarbazdary men sardarlary ózderiniń eptilikteri men qabiletterin turaqty túrde shyńdai otyryp, ozyq jaýyngerlik sheberlikterin kórsetip keledi.
Prezident Ekinshi Dúniejúzilik soǵysta 500-ge jýyq jerlesimiz Keńes Odaǵynyń batyry atanǵanyn, biraq kóptegen maidangerimizdiń erlikteri túrli sebepterge bailanysty eleýsiz qalǵanyn eske saldy.
Memleket basshysy jiynǵa qatysýshy ofitserlerge aty ańyzǵa ainalǵan úsh erjúrek jaýyngerdiń eren erligi týraly aitty. Bul maidangerlerge qaza bolǵannan keiin búgin «Halyq qaharmany» ataǵy berildi.
– Birinshisi – ataqty mergen Tóleýǵali Ábdibekov. Ol bir ózi maidan dalasynda 397 jaýdyń kózin joiǵan. Bul erlik tiisti qujattarmen dáleldengen. Qazaqtyń qaharman uly qaza tapqannan keiin Keńes Odaǵynyń Batyry ataǵyna usynylǵan. Biraq, erligi eskerýsiz qaldy. Kapitan Aleksandr Nesmiianov ta erekshe erlik pen qaharmandyq kórsetti. Ol boraǵan oqqa qaramastan, orda bekingen búkil batalondy ózimen birge shabýylǵa kóterdi. Jaý qorǵanysyn birinshi bolyp buzǵan Nesmiianov jaýdyń 20 jaýyngerimen jalǵyz alysyp, 13-iniń kózin joiǵan. Qalǵanyn bas saýǵalaýǵa májbúr etti. Kezekti urysta ol jaý shebiniń tylyna ótip, basty qaýipti ózine burdy, sóitip jaýdyń qorǵanys shebin serikteriniń buzyp ótýine múmkindik jasady. Al rotanyń eki komandiri jaralanǵan soń, basshylyqty óz qolyna aldy. Aleksandr Nesmiianov úsh ret Keńes Odaǵynyń Batyry ataǵyna usynyldy, biraq, ár kez oǵan ádiletsizdik jasalyp, eleýsiz qaldy. Jerlesimiz Ybyraiym Súleimenov te quralaidy kózge atqan naǵyz mergen bolǵan. Ol bir jyldyń ishinde 289 jaý áskerin joidy. Bul erlik te tarihi derekterde kórsetilgen. Qazaqtyń qaharman qyzy Mánshúk Mámetova ekeýi sońǵy demi qalǵansha jaýmen arpalysyp, qaza tapty. Batyr ataǵyna ekeýi qatar usynylǵanymen, Ybyraiym Súleimenovtiń erligi joǵary deńgeide baǵalanbady, – dedi Toqaev.
Prezident saltanatty is-sharaǵa qatysqan Tóleýǵali Ábdibekov pen Ybyraiym Súleimenovtiń týystaryna Halyq qaharmanynyń erekshelik belgisi «Altyn juldyz» ben «Otan» ordenin tabystady. Al Aleksandr Nesmiianovtyń nagradasy mýzei tórinen oryn alady.
Tóleýǵali Ábdibekovtiń týysy Aigúl Kemelbaeva Qasym-Jomart Toqaevqa jáne dańqty atasynyń atyn máńgi este saqtaýǵa atsalysqan jaýapty tulǵalardyń bárine alǵysyn aitty. Ybyraiym Súleimenovtiń qaryndasy Aitkúl Súleimenova Memleket basshysyna shyn júrekten alǵys bildirdi. Sondai-aq Prezidentke zor densaýlyq tilep, Jańa Qazaqstandy qurý isinde tabysqa jetýine niettestik bildirdi jáne sózin «Biz Sizge senemiz», – dep aiaqtady.
– Bul – shyn máninde, tarihi ádildiktiń saltanat qurýy. Biz erlerimizdiń esimin jańǵyrtyp, olardy ulyqtai beretin bolamyz. Óitkeni, erlik eshqashan eskirmeidi. Maidanger aǵa býyn keiingi urpaqqa árdaiym úlgi-ónege, – dedi Qasym-Jomart Toqaev.
Sóziniń sońynda Qasym-Jomart Toqaev memleketimizdiń tutastyǵy men qaýipsizdigin qorǵap júrgen elimizdiń barsha azamatyna alǵys aitty.
Budan keiin Prezident memlekettik nagradalardy tabystap, ofitserlerge áskeri jáne arnaýly ataqtar, synyptyq shender berdi.
Memleket basshysynyń qolynan áskeri jáne arnaýly ataq, synyptyq shen alǵan ofitserlerdiń tizimimen myna silteme arqyly tanysýǵa bolady.
