Memleket basshysy óńir ákimderiniń qatysýymen ótken keńeste Úkimet músheleriniń baiandamalaryn talqylaý barysynda bilim berý júiesiniń úshtildilik baǵdarlamasyn iske asyrý máselelerine nazar aýdardy. Bul týraly búgin QR Prezidentiniń baspasóz hatshysy Berik Qurmanǵali feisbýktaǵy paraqshasynda jazdy, dep habarlaidy "Ult aqparat".
«Bul - óte kúrdeli ári mańyzdy másele. Meniń ustanymym, birinshiden, qazaq tili bolýǵa tiis, orys tili bolýǵa tiis. Bulardyń balalarymyz úshin mańyzy zor. Tek sodan keiin ǵana aǵylshyn tilin oqytý kerek», - dedi Qazaqstan Prezidenti.
Aita ketsek, Elbasy Nursultan Nazarbaevtyń úshtildilik týraly ideiasy alǵash ret 2006 jyly Qazaqstan Halqy Assambleiasynyń HII sessiiasynda aityldy. Ol kezde Tuńǵysh Prezident kem degende úsh tildi bilý bizdiń balalarymyzdyń bolashaǵy úshin óte mańyzdy degen bolatyn.
Sodan soń Nazarbaev "Úsh tilde bilim berýdi damytý jol kartasyn" daiyndaýdy tapsyrdy. Baǵdarlamalyq qujatta 2015-2020 jyldarǵa 7 strategiialyq baǵyt qamtylǵan: zańnamalyq bazany qurý, úsh tilde bilim berý máseleleri boiynsha ǵylymi qyzmet, úsh tilde bilim berýdi ádistemelik qamtamasyz etý, mamandardy daiyndaý jáne bilimdi joǵarylatý, úsh tilde bilim berýdi institýtsionaldy qoldaý, úsh tilde bilim berýdi aqparattyq qoldaý, sonymen qatar bilimdi qarjylandyrý.
